ക്ഷേത്രദർശനത്തിനു പോയ വീട്ടമ്മ ഒഴുക്കില്‍പ്പെട്ടു:തെരച്ചിൽ തുടരുന്നു

കാട്ടാക്കട: പതിവ് ദർശനത്തിനായി ആര്യനാട്ട് ക്ഷേത്രത്തില്‍ പോയ വീട്ടമ്മയെ ഒഴുക്കില്‍പ്പെട്ട് കരമനയാറ്റില്‍ കാണാതായി. ആര്യനാട് ഗണപതിയാങ്കുഴി രമാനിവാസില്‍ രവീന്ദ്രന്റെ ഭാര്യ രമയെയാണ് (55) ഇന്ന് പുലര്‍ച്ചെ 5.45ന് ആര്യനാട് ആനന്ദേശ്വരം ശിവക്ഷേത്രത്തിന് സമീപത്തെ കടവിൽ കാണാതായത്. വര്‍ഷങ്ങളായി രമ ആനന്ദേശ്വരം ശിവക്ഷേത്രത്തില്‍ പുലര്‍ച്ചെ നിര്‍മാല്യ ദര്‍ശനത്തിന് പോകാറുണ്ടെന്ന് ബന്ധുക്കള്‍ പറയുന്നു.

പതിവ് പോലെ ക്ഷേത്ര ദര്‍ശനത്തിനാണ് ഇന്ന് പുലര്‍ച്ചെയും വീട്ടില്‍ നിന്ന് ഇറങ്ങിയത്. കരമനയാറിന്റെ കടവായ പൂവണം മൂട്ട്കടവില്‍ ഇറിഗേഷന്‍ വിഭാഗം നിര്‍മിച്ചിരിക്കുന്ന തടയണയിലൂടെ നടന്നാണ് ആറ് കടന്ന് ക്ഷേത്രത്തില്‍ എത്തുന്നത്. തടയണമുറിച്ചു കടക്കാന്‍ ശ്രമിച്ചെങ്കിലും ശക്തമായ ഒഴുക്കുള്ളതിനാല്‍ രമ തിരികെ മടങ്ങാന്‍ ശ്രമിക്കുന്നതിനിടെ തെന്നി വെള്ളത്തിലേക്ക് വീഴുകയായിരുന്നുവെന്ന് കടവിലുണ്ടായിരുന്ന ദൃക്‌സാക്ഷികൾ പറയുന്നു.

നെടുമങ്ങാട് നിന്ന് ഫയര്‍ഫോഴ്സും പൊലീസും സ്ഥലത്തെത്തിയിട്ടുണ്ട്. ആറിന്റെ ശക്തമായ അടിയൊഴുക്ക് തെരച്ചിലിനെ പ്രതികൂലമായി ബാധിക്കുന്നുണ്ടെന്ന് അധികൃതര്‍ പറയുന്നു.കഴിഞ്ഞ രണ്ട് ദിവസമായി പെയ്ത മഴയെത്തുടര്‍ന്ന് ആറില്‍ ശക്തമായ അടിയൊഴുക്കുണ്ടായിരുന്നു.