മീഡിയനി​ലേക്ക്​ ബൈക്ക്​ ഇടിച്ചുകയറി രണ്ട്​ യുവാക്കള്‍ മരിച്ചു

കൊച്ചി: നിയന്ത്രണം വിട്ട്​ മീഡിയനി​ലേക്ക്​ ബൈക്ക്​ ഇടിച്ചുകയറി രണ്ട്​ യുവാക്കള്‍ക്ക് ദാരുണാന്ത്യം. ഒരാള്‍ക്ക്​ പരിക്കേറ്റു. തിങ്കളാഴ്​ച പുലര്‍ച്ച 1.50ന്​ വൈറ്റില യമഹ ഷോറൂമിന്​ മുന്നിലാണ്​ അപകടം. ഇടുക്കി നെടുങ്കണ്ടം കൂട്ടാര്‍ കട്ടയക്കാനം കുന്നുംപുറത്ത് ബിബിന്‍ (23), കട്ടപ്പന ഈട്ടിത്തോപ്പ് തേക്കിന്‍കാനം കല്ലുകരോട്ട് സുജേഷ് (23) എന്നിവരാണ്​ മരിച്ചത്​. ഇവരുടെ കൂടെയുണ്ടായിരുന്ന കൂട്ടാര്‍ കട്ടയക്കാനം വരിക്കത്തറപ്പേല്‍ വി.കെ. അഖിലിനെ (19) പരിക്കുകളോടെ എറണാകുളം മെഡിക്കല്‍ ട്രസ്​റ്റ്​ ആശുപത്രിയില്‍ പ്രവേശിപ്പിച്ചു.

ബിബിനും സുജേഷും സംഭവസ്​ഥലത്തുതന്നെ മരിച്ചു. സുഹൃത്തുക്കളായ മൂവരും ബൈക്കില്‍ ആലപ്പുഴയിലെ സുഹൃത്തി​​ന്റെ വീട്ടിലേക്ക്​ പോകുന്ന വഴി നിയന്ത്രണം വിട്ട്​ മീഡിയനില്‍ ഇടിച്ചുകയറി മറിയുകയായിരുന്നു. മൃതദേഹങ്ങള്‍ എറണാകുളം ജനറല്‍ ആശുപത്രി മോര്‍ച്ചറിയില്‍ പോസ്​റ്റ്​മോര്‍ട്ടത്തിനുശേഷം ബന്ധുക്കള്‍ക്ക്​ വിട്ടുകൊടുത്തു. ബിബിനും സുജേഷും എറണാകുളത്ത്​ സ്വകാര്യ സ്​ഥാപനത്തിലെ ജീവനക്കാരാണ്​.