കൊട്ടാരക്കര: കൊട്ടാരക്കര കൃഷി ഓഫീസില്‍ കഴിഞ്ഞ ദിവസം നടന്നത് നാടകീയ രംഗങ്ങളാണ്. കൊട്ടാരക്കര വനിതാ അസിസ്റ്റന്റ് കൃഷി ഓഫീസറെയാണ് താത്കാലിക സ്വീപ്പര്‍ ജീവനക്കാരി ചൂല് കൊണ്ട് തല്ലിയത്. സംഭവത്തില്‍ ഓഫീസര്‍ ജീവനക്കാരിക്കെതിരെ ജില്ലാ മേധാവിക്ക് പരാതി നല്‍കി. ജോലിയ്ക്ക് വൈകിയെത്തിയത് ചോദ്യം ചെയ്തതിനാണ് തൂപ്പുകാരി ഇത്തരത്തില്‍ പ്രതികരിച്ചത്.
വൈകിയെത്തിയതെന്തിനാണെന്ന് ചോദിച്ചയുടന്‍ തൂപ്പുകാരി ഓഫീസറോട് ചൂടാവുകയായിരുന്നു. പിന്നീട് ആ വാക്കുതര്‍ക്കം കൈയ്യാങ്കളിയിലുമെത്തി. കലികൊണ്ട് വിറച്ച ജീവനക്കാരി കൈയ്യിലിരുന്ന ചൂലെടുത്ത് ഓഫീസറെ തല്ലുകയായിരുന്നു. എന്നാല്‍ ഓഫീസര്‍ പരാതി നല്‍കിയതിനെ തുടര്‍ന്ന് ഓഫീസില്‍ ഇരുവരും വീണ്ടും വാക്കുതര്‍ക്കമായി.
തുടര്‍ന്ന് തൂപ്പുകാരി ഓഫീസറെ ചെരുപ്പുകൊണ്ട് അടിക്കുകയായിരുന്നു. അടിയേറ്റ വനിതാ കൃഷി ഓഫീസര്‍ക്ക് താലൂക്ക് ആശുപത്രിയില്‍ ചികിത്സതേടി. വിവരമറിഞ്ഞ കൃഷി ഓഫീസര്‍ പ്രത്യേക അന്വേഷണസംഘത്തെ നിയമിക്കുകയും ഇവര്‍ സ്ഥലത്തെത്തി വിവരശേഖരണം നടത്തുകയും പാര്‍ട്ട് ടൈം ജീവനക്കാരിയെ താത്കാലികമായി സസ്പെന്‍ഡ് ചെയ്യുകയും ചെയ്തു.
Post Your Comments