ന്യൂഡല്‍ഹി: സഹായം അഭ്യർത്ഥിച്ച വിദ്യാര്‍ഥിയെ തിരുത്തി വിദേശ കാര്യ മന്ത്രി സുഷമ സ്വരാജ് . ട്വിറ്റര്‍ അക്കൗണ്ടില്‍ സ്ഥലം ഇന്ത്യന്‍ അധീന കശ്മീര്‍ എന്ന് എഴുതിയ വിദ്യാര്‍ഥിയെയാണ് സുഷമ സ്വരാജ് തിരുത്തിയത്. ഫിലിപ്പൈന്‍സില്‍ പഠിക്കുകയായിരുന്ന ഇന്ത്യന്‍ വിദ്യാര്‍ഥി ശൈഖ് അത്വീഖാണ് സുഷമാ സ്വരാജിന് ട്വിറ്റർ പോസ്റ്റിട്ടത്.
ജമ്മുകശ്മീര്‍ സ്വദേശിയായ താന്‍ ഫിലിപ്പൈന്‍സില്‍ മെഡിസിന് പഠിക്കുകയാണ് തന്റെ പാസ്പോര്‍ട്ട് നശിച്ചുപോയതിനാൽ ഒരു മാസം മുമ്പ് പുതിയ പാസ്പോര്‍ട്ടിന് അപേക്ഷിച്ചിരുന്നു. എന്നാൽ ഇതുവരെ പുതിയ പാസ്‌പോർട്ട് ലഭിച്ചിട്ടില്ല, തനിക്ക് ചികിത്സയ്ക്കായി ഉടൻതന്നെ നാട്ടിലേക്ക് പോകണം. അതുകൊണ്ട് തന്നെ പാസ്‌പോർട്ട് വേഗത്തിൽ ലഭിക്കാൻ തന്നെ സഹായിക്കണമെന്ന് അഭ്യര്‍ഥിക്കുന്നുവെന്നാണ് കുട്ടി സുഷമയോട് അപേക്ഷിച്ചത്.
സുഷമ സ്വരാജ് ഇതിന് മറുപടി നല്കുന്നതിനോടൊപ്പം ഒരു തെറ്റ് തിരുത്തുകയും ചെയ്തു. നിങ്ങള്‍ ജമ്മുകശ്മീരില്‍ നിന്നാണെങ്കില്‍ തീര്‍ച്ചയായും സഹായിക്കും. എന്നാല്‍ നിങ്ങളുടെ പ്രൊഫൈലില്‍ പറയുന്നത് ഇന്ത്യന്‍ അധീന കശ്മീര്‍ എന്നാണ്. അങ്ങനെ ഒരു സ്ഥലമില്ല എന്നാണ് സുഷമ നൽകിയ മറുപടി.
തെറ്റ് മനസിലായ ശൈഖ് തന്റെ പ്രൊഫൈല്‍ തിരുത്തി. അതില്‍ സന്തോഷം പ്രകടിപ്പിച്ച സുഷമ അധികൃതരോട് ശൈഖിന് വേണ്ട സഹായം ചെയ്തുകൊടുക്കാനും ആവശ്യപ്പെട്ടു. എന്നാല്‍ ശൈഖ് അത്വീഖിന്റെ അക്കൗണ്ട് നിലവില്‍ ലഭ്യമല്ല.
Post Your Comments