വാട്ടർ ടാങ്കിൽ വ്യാപാരി മരിച്ച നിലയിൽ ; സംഭവത്തിൽ ദുരൂഹത

ചാരുംമൂട് (ആലപ്പുഴ): വാട്ടർ ടാങ്കിൽ വ്യാപാരിയെ മരിച്ച നിലയിൽ കണ്ടെത്തി. സംഭവത്തില്‍ ദുരൂഹത പടരുന്നു. മാങ്കാംകുഴി വെട്ടിയാർ നാലുമുക്ക് ജംഗ്‌ഷനിലെ ഐശ്വര്യ സ്റ്റോഴ്സ് ഉടമ പാലവിളയിൽ സദാനന്ദനാണ് (65) മരിച്ചത്. പുലർച്ചെ കാണാതായതിനെ തുടർന്ന് ബന്ധുക്കൾ നടത്തിയ തിരച്ചിലിലാണ് വീടിനു സമീപം വെള്ളം ശേഖരിക്കാൻ സ്ഥാപിച്ചിട്ടുള്ള രണ്ടായിരം ലിറ്റർ ശേഷിയുള്ള ടാങ്കിൽ നിന്നും മൃതദേഹം കണ്ടെത്തിയത്.

ALSO READ ;നൃത്തം ചെയ്യുന്നതിനിടെ യുവാവ് കുഴഞ്ഞു വീണ് മരിച്ചു

മാവേലിക്കരയിൽ നിന്നുമെത്തിയ അഗ്നിശമന സേന ടാങ്ക് മുറിച്ചാണ് മൃതദേഹം പുറത്തെടുത്തത്. തുടർന്ന് കുറത്തികാട് പോലീസ് സ്ഥലത്തെത്തി ഇൻക്വസ്റ്റ് നടപടികൾക്ക് ശേഷം മൃതദേഹം പോസ്റ്റ്മോർട്ടത്തിനായി ആശുപത്രിയിലേക്ക് മാറ്റി. ആലപ്പുഴയിൽ നിന്നും ഫോറൻസിക് സംഘം സ്ഥലത്തെത്തി പരിശോധന നടത്തി. സംഭവത്തെ കുറിച്ച് പോലീസ് അന്വേഷണം ആരംഭിച്ചതായാണ് വിവരം.