ദളിത് യുവതിയെ ജീവനോടെ കത്തിച്ച് കൊലപ്പെടുത്തി

ലഖ്നൗ: ദളിത് യുവതിയെ ഒരു സംഘം ആളുകൾ തടഞ്ഞു നിർത്തി ദേഹത്ത് പെട്രോളൊഴിച്ച ശേഷം തീവെച്ച് കൊലപ്പെടുത്തി. ഉത്തര്‍പ്രദേശിലെ ഉന്നാവോ ജില്ലയിലാണ് അതിദാരുണമായ സംഭവം നടന്നത്. സൈക്കിളില്‍ പച്ചക്കറി മാര്‍ക്കറ്റില്‍ പോയി തിരിച്ചുവന്ന പതിനെട്ടുകാരിയെ തടഞ്ഞു നിർത്തിയ ശേഷമാണ് ഒരു സംഘം അഞ്ജാതര്‍ ഈ കൊടും കൃത്യം ചെയ്‌തത്‌. ജീവനായി ഓടിയെങ്കിലും മരണത്തിൽ നിന്നും രക്ഷപെടാൻ പെൺകുട്ടിക്ക് സാധിച്ചില്ല.

Also Read ;മധുവിന്റെ മൊഴി പുറത്ത്

കൊലപാതക കാരണം വ്യക്തമല്ല. കുടുംബ വൈരാഗ്യമാണോ കൃത്യത്തിലേക്ക് നയിച്ചതെന്ന സംശയം നില നിൽക്കുന്നു. സംഭവം നടന്ന സ്ഥലത്തിനരികില്‍ നിന്നും ഒഴിഞ്ഞ പെട്രോള്‍ കാനും തീപ്പെട്ടിയും കണ്ടെടുത്തിട്ടുണ്ടെന്നു പോലീസ് പറഞ്ഞു. അതേസമയം പെണ്‍കുട്ടിയുടെ വീട്ടുകാരുമായി ഐജി സുജിത് കുമാര്‍ പാണ്ഡെ ഉള്‍പ്പെടെയുള്ളവര്‍ സംസാരിച്ചു. വ്യക്തിപരമായി ആര്‍ക്കും തങ്ങളോട് വിരോധമുള്ളതായി അറിയില്ലെന്ന് പെൺകുട്ടിയുടെ കുടുംബം പറഞ്ഞു. മൃതദേഹം പോസ്റ്റ്മോര്‍ട്ടത്തിനായി വിട്ട് നല്‍കിയിരിക്കുകയാണ്. അന്വേഷണം വേഗത്തിലാക്കുമെന്ന് അധികൃതർ അറിയിച്ചു.