ന്യൂഡല്‍ഹി: രജനീകാന്തിന്റെ പാര്‍ട്ടി ചിഹ്നം തങ്ങളുടെ ലോഗോയുമായി സാമ്യമുള്ളതാണെന്ന് മുംബൈയിലെ സ്റ്റാര്‍ട്ട് അപ് സംരംഭകര്‍. 18 മാസം മാത്രം പ്രായമുള്ള സോഷ്യല്‍ നെറ്റ്‌വര്‍ക്കിങ് ആപ്പായ വോക്‌സ് വെബാണ് രജനിയുടെ ബാബ മുദ്ര തങ്ങളുടെ ലോഗോയുമായി സാമ്യമുള്ളതാണെന്ന് അവകാശപ്പെട്ട് രംഗത്തെത്തിയിരിക്കുന്നത്.
ചൂണ്ടുവിരലും ചെറുവിരലും മാത്രം ഉയര്‍ത്തിപിടിക്കുകയും മറ്റ് മൂന്ന് വിരലുകള്‍ മടക്കിപ്പിടിക്കുകയും ചെയ്യുന്നതാണ് ബാബ മുദ്ര. ഈ മുദ്രയ്ക്ക് ചുറ്റും വൃത്താകൃതിയില്‍ പാമ്പ് കിടക്കുന്നത് പോലുള്ളതുമായ പാര്‍ട്ടി ചിഹ്നമാണ് രജനിയുടേത്. ഇതോടൊപ്പം തള്ളവിരലും ഉയര്‍ത്തിപ്പിടിച്ചിരിക്കുന്ന രീതിയിലാണ് വോക്‌സ് വെബിന്റെ ലോഗോ. ഈ സാമ്യമാണ് സ്റ്റാര്‍ട്ട് അപ് സംരംഭകരെ ആശങ്കയിലാഴ്ത്തിയിരിക്കുന്നത്.
മറ്റേതെങ്കിലും കമ്പനികള്‍ക്കാണ് ഇതേ മുദ്രയെങ്കില്‍ വലിയ പ്രശ്‌നം ഉണ്ടാക്കില്ല. എന്നാല്‍ സാമുഹിക മാധ്യമങ്ങളും രാഷ്ട്രീയ പാര്‍ട്ടികളും ജനങ്ങളുമായി വളരെ അടുത്തിടപഴകുന്നവരാണെന്നും അതിനാല്‍ മുദ്രകള്‍ ആശയക്കുഴപ്പം സൃഷ്ടിക്കുമെന്ന് കമ്പനി സ്ഥാപകന്‍ യാഷ് മിശ്ര പറഞ്ഞു.
തെരഞ്ഞെടുപ്പ് സമയത്ത് ചില രാഷ്ട്രീയ പാര്‍ട്ടികളെ പിന്തുണക്കുന്നുവെന്ന് സാമൂഹിക മാധ്യമങ്ങളില്‍ ആരോപണം ഉയരാറുണ്ട്. ഇപ്പോള്‍ തന്നെ രജനീകാന്തിന് വോക്‌സ് വെബില്‍ നിക്ഷേപമുണ്ടോ എന്ന് പലരും ചോദിക്കാറുണ്ടെന്നും യാഷ് മിശ്ര പറഞ്ഞു. സംഭവത്തെ കുറിച്ച് രജനിക്ക് എഴുതിയിട്ടുണ്ടെന്നും എന്നാല്‍ ഇതുവരെ മറുപടി ഒന്നും ലഭിച്ചിട്ടില്ലെന്നും യാഷ് കൂട്ടിച്ചേര്‍ത്തു.
Post Your Comments