കോട്ടയം മെഡിക്കല്‍ കോളേജിലെ എംബിബിഎസ് കോഴ്സിന്റെ അംഗീകാരം റദ്ദാക്കി

കോട്ടയം: കോട്ടയം സർക്കാർ മെ‍ഡിക്കൽ കോളേജിലെ എംബിബിഎസ് കോഴ്സിന്റെ അം​ഗീകാരം മെഡിക്കൽ കൗൺസിൽ ഓഫ് ഇന്ത്യ (എംസിഐ) റ​ദ്ദാക്കി. അടിസ്ഥാന സൗകര്യങ്ങളുടേയും അധ്യയന വിഭാ​ഗത്തിന്റേയും അഭാവങ്ങൾ പരി​ഗണിച്ചാണ് എംസിഐ അം​ഗീകാരം റദ്ദാക്കിയത്. സംഭവത്തിൽ എം​സി​ഐ മെഡിക്കൽ കോളേജ് പ്രിൻസിപ്പലിനോട് വിശദമായ റിപ്പോർട്ട് തേടി.

ജൂലൈ 26, 27 തീയതികളിൽ മെഡിക്കൽ കൗൺസിൽ ഓഫ് ഇന്ത്യയുടെ വി​ദ​ഗ്ധ സംഘം കോട്ടയം മെഡിക്കൽ കോളേജിൽ പരിശോധന നടത്തിയിരുന്നു. ഇവർ സമർപ്പിച്ച റിപ്പോർട്ടിന്റെ അടിസ്ഥാനത്തിലാണ് നടപടി.

അതേസമയം, കോഴ്സിന്റെ അനുമതി റദ്ദാക്കിയത് സാങ്കേതിക പിഴവാണെന്നാണ് ആരോ​ഗ്യ അഡീഷണൽ ചീഫ് സെക്രട്ടറി രാജീവ് സദാനന്ദന്റെ ഭാഷ്യം. വിശദീകരണ റിപ്പോർട്ട് സമർപ്പിച്ചതിനു ശേഷം എംസിഐ തീരുമാനം പുനഃപരിശോധിക്കുമെന്നാണ് കരുതുന്നത്. കൂടാതെ, റിപ്പോർട്ടിൽ ചൂണ്ടിക്കാട്ടിയിട്ടുള്ള അസൗകര്യങ്ങൾ സർക്കാർ പരി​ഗണിക്കുകയും പരിഹരിക്കുകയും ചെയ്യുമെന്നും രാജീവ് പറഞ്ഞു.

നിലവിൽ 150 എംബിബിഎസ് സീറ്റുകളാണ് കോട്ടയം മെഡിക്കൽ കോളേജിനുള്ളത്. കോളേജിന്റെ വിശദീകരണം മെഡിക്കൽ കൗൺസിൽ ഓഫ് ഇന്ത്യ തള്ളിയാൽ 50 സീറ്റുകൾ കോളേജിനു നഷ്ടപ്പെടും.