കോഴിക്കോട്: കോഴിക്കോട് മലബാര്‍ മെഡിക്കല്‍ കോളജില്‍ നിന്ന് എംബിബിഎസിന് പ്രവേശനം നേടിയ 33 വിദ്യാര്‍ത്ഥികളെ പുറത്താക്കി. ആറു ലക്ഷം രൂപയുടെ ബാങ്ക് ഗ്യാരന്റി നല്‍കാത്തതിനെ തുടര്‍ന്നാണ് വിദ്യാര്‍ഥികളെ പുറത്താക്കിയത്. സ്വാശ്രയപ്രവേശന ഫീസുമായി ബന്ധപ്പെട്ട കേസില്‍ സുപ്രിംകോടതി, ആറു ലക്ഷം രൂപയ്ക്ക് ബാങ്ക് ഗ്യാരന്റി ഈടാക്കാന്‍ കോളേജുകള്‍ക്ക് അനുമതി നല്‍കിയിരുന്നു.
തുടര്‍ന്ന് ഇത് പല വിദ്യാര്‍ത്ഥികള്‍ക്കും സാധ്യമാകാത്ത സാഹചര്യത്തില്‍ സംസ്ഥാന സര്‍ക്കാര്‍ പ്രശ്നത്തില്‍ ഇടപെടുകയും സര്‍ക്കാര്‍ തലത്തില്‍ ബാങ്ക് ഗ്യാരന്റി ഉറപ്പുവരുത്താനുള്ള നടപടികള്‍ സ്വീകരിച്ചുവരുകയും ചെയ്യുകയാണ്. കുട്ടികളോടു ബാങ്ക് ഗാരന്‍റി ആവശ്യപ്പെടരുതെന്ന് സംസ്ഥാന സര്‍ക്കാര്‍ നല്‍കിയ കര്‍ശന നിര്‍ദേശം നിലനില്‍ക്കെയാണ് കോളേജ് അധികൃതരുടെ നടപടി. രണ്ടാഴ്ച മുന്‍പ് പ്രവേശനം നേടിയവരെയാണ് കോളേജ് അധികൃതര്‍ ക്ലാസില്‍ നിന്ന് പുറത്താക്കിയത്. ബാങ്ക് ഗ്യാരന്റി നല്‍കിയശേഷം മാത്രമേ ക്ലാസില്‍ പ്രവേശിപ്പിക്കൂവെന്നാണ് അധികൃതര്‍ പറയുന്നത്.
11 ലക്ഷം രൂപ ഫീസ് നിശ്ചയിച്ചതില്‍ ആറു ലക്ഷം രൂപയാണ് കുട്ടികള്‍ ബാങ്ക് ഗാരന്‍റിയായി നല്‍കേണ്ടത്. എന്നാല്‍ മലബാര്‍ മെഡിക്കല്‍ കോളേജില്‍ അഞ്ച് ലക്ഷത്തിന് പകരം തങ്ങളോട് ഏഴ് ലക്ഷം രൂപ പ്രവേശനസമയത്ത് ഈടാക്കിയതായും വിദ്യാര്‍ത്ഥികള്‍ വ്യക്തമാക്കുന്നു. സ്വാശ്രയ മെഡിക്കല്‍ കോളജ് പ്രവേശനത്തിനു ബാങ്ക് ഗാരന്‍റി നല്‍കാത്ത കാരണത്താല്‍ മാത്രം ഒരു വിദ്യാര്‍ഥിക്കും പ്രവേശനം നഷ്ടമാവില്ലെന്നു സര്‍ക്കാര്‍ ഹൈക്കോടതിയില്‍ ഉറപ്പു നല്‍കിയിരുന്നു. പിന്നീട് മുഖ്യമന്ത്രി പിണറായി വിജയനും ആരോഗ്യമന്ത്രി കെ.കെ.ശൈലജയും ഈ നിലപാട് ആവര്‍ത്തിച്ചു.
Post Your Comments