ചണ്ഡിഗഢ്: ദേര സച്ചാ സൗദ തലവന്‍ ഗുര്‍മീത് റാം റഹിം സിങ്ങിനെതിരായ മാനഭംഗക്കേസില്‍ വിധി ഇന്ന്. വിധി വരുന്നതിനാല്‍ പഞ്ചാബ്, ഹരിയാന സംസ്ഥാനങ്ങള്‍ അതീവ ജാഗ്രതയിലാണ്. പഞ്ച്കുല പ്രത്യേക സിബിഐ കോടതിയാണ് ഇന്നു വിധി പുറപ്പെടുവിക്കുക.
ഹരിയാനയിലെ സിര്‍സയിലെ ദേര ആശ്രമത്തില്‍ വനിതാ അനുയായിയെ മാനഭംഗപ്പെടുത്തിയെന്നാണ് കേസ്. ഒരു ലക്ഷത്തോളം അനുയായികളാണു റാം റഹിം സിങ്ങിനു പിന്തുണ പ്രഖ്യാപിച്ചു ചണ്ഡിഗഡ് സെക്ടര്‍ 23ലെ പ്രാര്‍ഥനാകേന്ദ്രമായ നാം ചര്‍ച്ചാ ഘറില്‍ ഇതിനോടകം എത്തിയിരിക്കുന്നത്.
15,000 അര്‍ധ സൈനികരെയാണ് പഞ്ചാബ്, ഹരിയാന സംസ്ഥാനങ്ങളില്‍ സുരക്ഷയ്ക്കു നിയോഗിച്ചിരിക്കുന്നത്. മൂന്നു ദിവസത്തേക്ക് മൊബൈല്‍ ഇന്റര്‍നെറ്റ് സംവിധാനം നിരോധിച്ചിട്ടുണ്ട്. സോഷ്യല്‍മീഡിയയിലെ നിരീക്ഷണം ശക്തമാക്കി. മുന്‍കരുതലെന്ന നിലയില്‍ ഇരു സംസ്ഥാനങ്ങളിലേക്കുമുള്ള 29 ട്രെയിനുകള്‍ റദ്ദാക്കി. ചണ്ഡിഗഡിനു സമീപത്തുള്ള പഞ്ച്കുല ജില്ലയിലെ വിദ്യാഭ്യാസ സ്ഥാപനങ്ങള്‍ മൂന്നു ദിവസത്തേക്ക് അടച്ചിടാന്‍ നിര്‍ദേശം നല്‍കിയിട്ടുണ്ട്.
പൊലീസിെന്‍റ വലിയ സന്നാഹങ്ങള്‍ക്ക് പുറമെ 150 കമ്പനി സേനയെ കേന്ദ്രസര്‍ക്കാര്‍ അയച്ചിട്ടുണ്ട്. ചണ്ഡീഗഢിലുള്ള എല്ലാ സര്‍ക്കാര്‍ ഒാഫിസുകളും നാളെ അടച്ചിടുമെന്ന് പഞ്ചാബ് സര്‍ക്കാര്‍ അറിയിച്ചു.എന്നാല്‍, കടുത്ത നിയന്ത്രണങ്ങള്‍ക്കിടയിലും പഞ്ച്കുളയിലേക്ക് ദേര സച്ചാ സൗധ അനുയായികളുടെ ഒഴുക്ക് തുടരുകയാണ്. ക്രമസമാധാനത്തിന് വെല്ലുവിളിയെന്ന് സംശയിക്കുന്നവരെ കസ്റ്റഡിയില്‍ പാര്‍പ്പിക്കുന്നതിന് ചണ്ഡിഗഢിലെ സെക്ടര്‍ 16 ക്രിക്കറ്റ് സ്റ്റേഡിയം താല്‍ക്കാലിക ജയിലായി പ്രഖ്യാപിച്ചു. 1999ല്‍ അനുയായിയായ സ്ത്രീയെ ഗുര്‍മീത് റാം റഹീം സിങ് ബലാത്സംഗം ചെയ്തുവെന്നാണ് കേസ്.
Post Your Comments