തിരുവനന്തപുരം – കന്യാകുമാരി പാത ഇരട്ടിപ്പിക്കാൻ 1553 കോടി

ന്യൂഡൽഹി: തിരുവനന്തപുരം– കന്യാകുമാരി റെയിൽപ്പാത ഇരട്ടിപ്പിക്കാൻ കേന്ദ്രമന്ത്രിസഭയുടെ സാമ്പത്തികകാര്യ സമിതി അനുമതി നൽകി. വിഴിഞ്ഞം തുറമുഖം 2019ൽ പ്രവർത്തനം ആരംഭിക്കുന്നതു കൂടി കണക്കിലെടുത്താണ് പദ്ധതിക്ക് അനുമതി നൽകുന്നത്. വൈദ്യുതീകരിച്ച് പാത ഇരട്ടിപ്പിക്കാൻ 1553 കോടിയാണ് കണക്കാക്കിയിരിക്കുന്നത്. 86.56 കിലോമീറ്റർ പാതയാണ് ഇതിലൂടെ ഇരട്ടിപ്പിക്കുന്നത്.

നാഗർകോവിലിൽ നിന്ന്‍ തിരുനെൽവേലി വഴി വഞ്ചിയിലേക്കുള്ള 102 കിലോമീറ്റർ പാത ഇരട്ടിപ്പിക്കാൻ 1114.62 കോടി രൂപയുടെ പദ്ധതിക്കും അനുമതി നൽകി. 2020–21ൽ പൂർത്തിയാകും. മധുര– വഞ്ചി, മണിയാച്ചി – തൂത്തുക്കുടി പാതകൾ ഇരട്ടിപ്പിക്കാനും തീരുമാനിച്ചു. ഇരുപാതകളുമായി 106 കിലോമീറ്റർ പാത ഇരട്ടിപ്പിക്കലിനു 1272.51 കോടി രൂപയാണു ചെലവു കണക്കാക്കുന്നത്. ഈ പദ്ധതിയും 2020–21ൽ പൂർത്തിയാകുമെന്നാണ് കരുതുന്നത്.