കേരളത്തിലേക്കുള്ള വിമാനസർവീസുകൾ; ആശങ്ക വേണ്ടെന്ന് ഖത്തർ എയർവേയ്‌സ്

ദോഹ: കേരളത്തിൽ നിന്നും ഖത്തറിലേക്കുള്ള വിമാന സർവ്വീസുകളൊന്നും റദ്ദാക്കിയിട്ടില്ലെന്ന് ഖത്തർ എയർവെയ്സ് അധികൃതർ. കൊച്ചിയിൽ നിന്ന് ദോഹയിലേക്കും തിരികെയും ഖത്തർ എയർവെയ്‌സിന്റെ രണ്ടും ജെറ്റ് എയർവെയ്‌സിന്റെ ഒരു സർവീസും ഉൾപ്പെടെ ദിവസം മൂന്ന് വിമാനസർവീസുകളാണുള്ളത്. ഇവയിൽ മൂന്നിലും കൂടി ഒരേ സമയം 750 പേർക്ക് യാത്ര ചെയ്യാവുന്നതാണെന്നും അധികൃതർ അറിയിച്ചു.

അതേസമയം ഖത്തറിൽ അവധിക്കാലമായതിനാൽ തിരക്ക് കൂടുന്ന പക്ഷം ടിക്കറ്റ് നിരക്ക് വർദ്ധിക്കുവാനുള്ള സാദ്ധ്യതയുണ്ട്. ഭീകരർക്ക് സഹായം നൽകുന്നുവെന്ന് ആരോപിച്ച് ഖത്തറുമായുള്ള നയതന്ത്രബന്ധം സൗദി, യു.എ.ഇ, ബഹ്റിൻ, ഈജിപ്‌ത് തുടങ്ങിയ രാജ്യങ്ങൾ അവസാനിപ്പിച്ചതിനെ തുടർന്നാണ് ഇന്ത്യക്കാർ ഉൾപ്പെടെയുള്ളവർ പ്രതിസന്ധിയിലായിരിക്കുന്നത്.