പാളം മുറിച്ചു കടന്ന പെണ്‍കുട്ടിയെ ട്രെയിന്‍ ഇടിച്ചിട്ടു ; ഞെട്ടിപ്പിക്കുന്ന വീഡിയോ പുറത്ത്

മുംബൈ : പാളം മുറിച്ചു കടന്ന പെണ്‍കുട്ടിയെ  ട്രെയിന്‍ ഇടിച്ചിട്ടു. ഒരു സ്റ്റേഷന്‍ ഒന്നാകെ നടന്നത് ഞെട്ടിപ്പിക്കുന്ന സംഭവമായിരുന്നു. എന്നാല്‍ തീവണ്ടി കടന്നു പോയപ്പോള്‍ കാര്യമായ പരിക്കുകളൊന്നുമില്ലാതെ പെണ്‍കുട്ടി എഴുന്നേറ്റു നിന്നു. മുംബൈയിലെ കുര്‍ള റെയില്‍വേസ്റ്റേഷനില്‍ മെയ് 19നായിരുന്നു സംഭവം. ബന്ദുപില്‍ താമസിക്കുന്ന പ്രതീക്ഷ നടേകര്‍ എന്ന 19കാരി ഏഴാം പ്ലാറ്റ്‌ഫോം ലക്ഷ്യമാക്കി പാളം മുറിച്ചു കടക്കുകയായിരുന്നു.

ഇയര്‍ഫോണില്‍ സംസാരിച്ചു കൊണ്ട് പാളം മുറിച്ചു കടക്കുകയായതിനാല്‍ എതിരെ വന്ന തീവണ്ടി കുട്ടിയുടെ ശ്രദ്ധയില്‍ പെട്ടില്ല. ഉടന്‍ തന്നെ പ്ലാറ്റ് ഫോം ലക്ഷ്യമാക്കി വേഗത്തില്‍ നീങ്ങിയെങ്കിലും കഴിയാതെ വന്നപ്പോള്‍ പരിഭ്രാന്തയായ കുട്ടി ട്രാക്കിലൂടെ ഓടി രക്ഷപ്പെടാന്‍ ശ്രമിച്ചു. പാളത്തിലൂടെ ഓടിയ കുട്ടിയെ എല്ലാവരും നോക്കി നില്‍ക്കെയാണ് തീവണ്ടി ഇടിച്ചിട്ടത്. ആദ്യത്തെ ബോഗി ശരീരത്തിനു മുകളിലൂടെ കടന്നു പോയതോടെ ലോക്കോപൈലറ്റ് തീവണ്ടി നിര്‍ത്തി.

കുട്ടി മരിച്ചെന്ന ഉറപ്പിലായിരുന്നു എല്ലാവരും. എന്നാല്‍ വണ്ടിക്കടിയില്‍ പരിക്കുകളൊന്നുമില്ലാതെ കിടക്കുന്ന കുട്ടിയെ യാത്രക്കാര്‍ കണ്ടെത്തുകയായിരുന്നു. ഇടത്തെ കണ്ണിനടുത്തായി ചെറിയ മുറിവൊഴിച്ചാല്‍ കാര്യമായ പരിക്കുകളൊന്നുമില്ല. സ്റ്റേഷന്‍ പുറത്ത് വിട്ട സിസിടിവി ദൃശ്യങ്ങള്‍ ഇതിനോടകം 30 ലക്ഷം പേരാണ് കണ്ടത്.