വിമാനം അപകടത്തില്‍ നിന്ന് തലനാരിഴയ്ക്ക് രക്ഷപ്പെട്ടു

സിബു(മലേഷ്യ)•ശക്തമായ മഴയ്ക്കിടെ മലേഷ്യന്‍ എയര്‍ലൈന്‍സ് വിമാനം റണ്‍വേയില്‍ നിന്നും തെന്നിമാറി. കഴിഞ്ഞദിവസം മലേഷ്യയിലെ സിബു വിമാനത്താവളത്തിലാണ് സംഭവം.

ക്വലാലം പൂരില്‍ നിന്ന് വന്ന ബോയിംഗ് 737-800 വിമാനത്തില്‍ യാത്രക്കാരും ജീവനക്കാരും ഉള്‍പ്പടെ 61 പേരാണ് ഉണ്ടായിരുന്നത്.

പ്രാദേശിക സമയം ശനിയാഴ്ച രാത്രി 10.17 നായിരുന്നു സംഭവം. ഉടന്‍ തന്നെ എം.എച്ച് 2718 വിമാനത്തിന്റെ വശങ്ങളിലെ എമര്‍ജന്‍സി വാതിലുകള്‍ വഴി യാത്രക്കാരെ മുഴുവന്‍ സുരക്ഷിതമായി ഒഴിപ്പിച്ചു. ആര്‍ക്കും പരിക്കില്ല.

സംഭവത്തെക്കുറിച്ച് അന്വേഷണം ആരംഭിച്ചതായി മലേഷ്യന്‍ എയര്‍ലൈന്‍സ് അറിയിച്ചു.

സംഭവത്തെത്തുടര്‍ന്ന് ഞായറാഴ്ച രാവിലെ 10 വരെ വിമാനത്താവളം അടച്ചിട്ടു. സിബുവില്‍ നിന്നുള്ള 48 ഓളം വിമാനങ്ങളാണ് ഇതെത്തുടര്‍ന്ന് റദ്ദാക്കിയത്.