ടിപ്പു ജയന്തി വിരുദ്ധ കലാപം : ആര്‍.എസ്.എസിനൊപ്പം ക്രിസ്ത്യൻ അസോസിയേഷനും

കഴിഞ്ഞവർഷത്തത്തെ ടിപ്പു ജയന്തി വിരുദ്ധ കലാപങ്ങളിൽ ആർഎസ്എസ്സിനൊപ്പം ക്രിസ്തവ സംഘടനകളും പ്രവർത്തിച്ചു. ആർഎസ്എസ്സിനൊപ്പം തെരുവിലിറങ്ങാനും ജയന്തി ദിനത്തിൽ ഹർത്താലിന് ആഹ്വാനം ചെയ്യാനും ‘യുണൈറ്റഡ് ക്രിസ്ത്യൻ അസോസിയേഷൻ’ മുന്നിൽ തന്നെ ഉണ്ടായിരുന്നു.

തുടക്കത്തിൽ വേറിട്ട് നിന്നുകൊണ്ട് ജയന്തി വിരുദ്ധ സമരങ്ങളിൽ ഏർപ്പെട്ട ആർഎസ്എസും യുണൈറ്റഡ് ക്രിസ്ത്യൻ അസോസിയേഷനും പിന്നീട് ഒന്നിക്കുകയായിരുന്നു. ഇരു വിഭാഗങ്ങളും മംഗളുരു ഡെപ്യൂട്ടി കമ്മീഷണർ ഓഫിസിനു മുന്നിൽ സംഘടിപ്പിച്ച പ്രതിഷേധപരിപാടിയിൽ ഒരുമിച്ചു പങ്കെടുത്തു. ഹിന്ദു, ക്രിസ്ത്യൻ ജനവിഭാഗത്തിന് നേരെ ടിപ്പു സുൽത്താൻ നടത്തിയ വർഗീയമായ ആക്രമണങ്ങളെക്കുറിച്ചും മറ്റും ഇരുവിഭാഗവും ഒരുമിച്ച് പ്രസംഗിച്ചു.

ഇതാദ്യമായല്ല ടിപ്പു വിരുദ്ധ സഖ്യം രൂപപ്പെടുന്നത്. 2013ൽ ശ്രീരംഗപട്ടണം സെൻട്രൽ യൂണിവേഴ്‌സിറ്റിക്ക് ടിപ്പുവിന്റെ പേര് നൽകാൻ നീക്കം നടപ്പോഴും യുണൈറ്റഡ് ക്രിസ്ത്യൻ അസോസിയേഷൻ സംഘപരിവാർ സംഘടനകൾക്കൊപ്പം സമരത്തിനിറങ്ങിയിരുന്നു.

1680ൽ മംഗളൂരുവിൽ നിർമിച്ച ചരിത്ര പ്രസിദ്ധമായ മിലാഗ്രസ് പള്ളി ടിപ്പു സുൽത്താൻ തകർത്തുവെന്നതിനെ ഏറെ വൈകാരികമായി സംഘടന പ്രചരിപ്പിക്കുകയും ചെയ്തിരുന്നു.
2008ൽ മംഗളൂരുവിൽ സംഘപരിവാർ സംഘടനകളുടെ നേതൃത്വത്തിൽ നടന്ന ചർച്ച് ആക്രമണങ്ങളുടെ കരിനിഴൽ മായ്ക്കാനായാണ് ആർഎസ്എസ് ശ്രമമെന്ന് ഇടതു പക്ഷ – പുരോഗമന സംഘടനകൾ ആരോപിച്ചിരുന്നു. 2013 മുതൽ സജീവമായ ടിപ്പു വിരുദ്ധ സംഘപരിവാർ – യുണൈറ്റഡ് ക്രിസ്ത്യൻ അസോസിയേഷൻ കൂട്ടുകെട്ടിനെ മതേതര വിരുദ്ധ മുന്നണിയെന്ന തലത്തിലേക്ക് ഉയർത്താനുള്ള ശ്രമമാണ് നാഗരാജിന്റെ പ്രസ്താവനകൾക്ക് പിന്നിലുള്ളത്.