പുസ്തകക്കച്ചവടക്കാരനെ ഇറക്കിവിട്ട പ്രധാനാദ്ധ്യാപകന് എഞ്ചുവടി സമ്മാനം

പാലക്കാട് നഗരത്തിലെ പ്രസിദ്ധമായ വിദ്യാലയത്തിൽ നിന്ന് പുസ്തകക്കച്ചവടക്കാരനെ ഇറക്കിവിട്ട പ്രധാനാദ്ധ്യാപകന്റെ നടപടിയിൽ പ്രതിഷേധം വ്യാപകമാവുന്നു.

മലയാളം അദ്ധ്യാപകരുടെ അവധിക്കാല പരിശീലനം നടക്കുന്ന കേന്ദ്രത്തിൽ അദ്ധ്യാപകർക്ക് പുതിയ പാഠപുസ്തകം പഠിപ്പിക്കാൻ സഹായകമാവുന്ന സാഹിത്യ കൃതികൾ വിൽക്കാനെത്തിയ നഗരിപ്പുറം എ വി ശശിയെന്ന പുസ്തകക്കാരനെയാണ് പ്രധാനാദ്ധ്യാപകൻ അപമാനിച്ച് ഇറക്കിവിട്ടത്. പതിറ്റാണ്ടുകളായി പുസ്തകം വിറ്റ് ജീവിക്കുന്ന ശശി മികച്ച വായനക്കാരൻ, എഴുത്തുകാരൻ, സാംസ്കാരിക പ്രവർത്തകൻ എന്നീ നിലകളിൽ പാലക്കാടിന് പുറത്തും സുപരിചിതനായ വ്യക്തിയാണ്. വി.കെ.ശ്രീരാമന്റെ പ്രസിദ്ധമായ ‘വേറിട്ട കാഴ്ചകളിൽ ‘ ശശിയുടെ ജീവിതം കടന്നുവന്നിട്ടുണ്ട്.
താനാരാണെന്നും തന്റെ ഉദ്ദേശമെന്താണെന്നും വിനയത്തോടെ വിശദീകരിച്ചിട്ടും പ്രധാനാദ്ധ്യാപകൻ പുസ്തകം വിൽക്കാനുള്ള അനുമതി നിഷേധിക്കുകയായിരുന്നുവത്രെ. സ്കൂൾ പരിസരങ്ങളിൽ കുട്ടികൾക്ക് മയക്കുമരുന്ന് വിൽക്കുന്നവരെ നിരീക്ഷിക്കാൻ കാണിക്കാത്ത ജാഗ്രത പുസ്തകക്കച്ചവടക്കാരനു നേരെ പുലർത്തുന്നത് എന്തായാലും അത്ഭുതപ്പെടുത്തുന്നു…
അദ്ധ്യാപകനോട് കയർക്കാതെ ക്ഷമ ചോദിച്ച് പുറത്തിറങ്ങിയ ശശി പിറ്റേന്ന് രാവിലെ അതേ വിദ്യാലയത്തിലെത്തി ഒരു സമ്മാനപ്പൊതിയും കത്തും പ്രധാനാദ്ധ്യാപകന് നൽകി. കത്തിന്റെ പകർപ്പ് ഫേസ് ബുക്കിൽ പ്രസിദ്ധീകരിക്കുകയും ചെയ്തു. സമ്മാനപ്പൊതിയിൽ മലയാളം അക്ഷരമാലയുൾപ്പെടുന്ന എഞ്ചുവടിയും ആമയും മുയലും കഥാപുസ്തകവുമായിരുന്നു!!