കൊച്ചി : സ്മാര്‍ട്ട് ഫോണ്‍ ഉപഭോക്താക്കള്‍ക്ക് ഒരു സന്തോഷവാര്‍ത്ത. മലയാള ചാനലുകളെല്ലാം ഇനി ഒറ്റ ആപ്ലിക്കേഷനില്‍ കാണാന്‍ അവസരം. എറണാകുളം ഇന്‍ഫോപാര്‍ക്കിലെ സ്റ്റാര്‍ട്ട് അപ്പ് സംരംഭമായ ടിവി സോണാണ് പുതിയ ആപ്ലിക്കേഷനുമായി എത്തിയത്. ഇഷ്ടപ്പെട്ട പരിപാടികളെല്ലാം തികച്ചും സൗജന്യമായി ടിവി സോണ്‍ ആപ്പിലൂടെ കാണാന്‍ സാധിക്കും.
ലോകത്ത് എവിടെ ഇരുന്നും കാണാവുന്ന ടിവി സോണ്‍ ആപ് ഇപ്പോള്‍ ആന്‍ഡ്രോയിഡ് ഫോണുകളിലാണ് ലഭ്യമായിട്ടുള്ളത്. ഉടന്‍ തന്നെ വിന്‍ഡോസ് അടക്കം ഫോണുകളിലേക്കും ഈ സേവനമെത്തും. ഭാഷാടിസ്ഥാനത്തില്‍ ഇഷ്ടപ്പെട്ട ചാനലുകള്‍ സ്മാര്‍ട്ട് ഫോണിലൂടെ കാണുന്നതിനൊപ്പം ഇഷ്ടപ്പെടുന്ന വീഡിയോകള്‍ സുഹൃത്തുക്കള്‍ക്കായി ഷെയര്‍ ചെയ്യുന്നതിനുള്ള സാഹചര്യവും ടിവി സോണ്‍ ഒരുക്കുന്നു. ഈ സൗകര്യങ്ങളെല്ലാം സൗജന്യമാണ്.
മൊബൈലിലെ ഇന്റര്‍നെറ്റ് കണക്ഷന്റെ സ്പീഡാണ് ടിവി സോണ്‍ വഴി കാണുന്ന ചാനലുകളുടെ ക്വാളിറ്റി നിര്‍ണയിക്കുക. 3ജി സ്പീഡെങ്കിലും ലഭ്യമാകുന്ന ഇന്റര്‍നെറ്റ് കണക്ഷനുകള്‍ ഉപയോഗിക്കുന്നതാണ് മികച്ച രീതിയില്‍ വീഡിയോ കാണാന്‍ സഹായിക്കുക. വളരെ കുറച്ച് ഡേറ്റ മാത്രമേ ടിവി സോണ്‍ സേവനത്തിനായി മാറ്റിവെയ്‌ക്കേണ്ടതുള്ളു എന്നതും ആകര്‍ഷകമാണ്. ചാനലുകളിലെ ഇഷ്ടപ്പെട്ട പരിപാടികള്‍ തരം തിരിച്ച് കാണുന്നതിനും സൂക്ഷിക്കുന്നതിനുമുള്ള സൗകര്യവും ആപ്പ് നല്‍കുന്നുണ്ടെന്ന് ടിവി സോണ്‍ അധികൃതര്‍ വ്യക്തമാക്കുന്നു. നിലവില്‍ ഉള്ളതിനേക്കാള്‍ കൂടുതല്‍ ചാനലുകള്‍ ടിവി സോണ്‍ ഉടന്‍ ലഭ്യമാക്കുമെന്നും അതിനായി ചാനലുകളുമായി ചര്‍ച്ചകള്‍ പുരോഗമിക്കുന്നതായും സംരംഭകര്‍ പറയുന്നു.
Post Your Comments