ഏറെക്കാലത്തിന് ശേഷം കണ്ടതിന്റെ സന്തോഷം പങ്കുവച്ച് മദ്യപിച്ച് ആഘോഷിയ്ക്കുകയായിരുന്ന യുവാവിനെയും കൂട്ടുകാരിയായ അധ്യാപികയെയും പോലീസ്‌ അറസ്‌റ്റ് ചെയ്‌തു.
കോഴിക്കോട് കടപ്പുറത്ത് മരത്തണലില്‍ കുടയുടെ മറവിലിരുന്ന്‍ മദ്യപിച്ച് ലക്കുകെട്ട കൊടുങ്ങല്ലൂര്‍ സ്വദേശി ഗിരീഷ്‌(48), മാനന്തവാടി സ്വദേശിയായ യുവതി എന്നിവരാണ്‌ അറസ്‌റ്റിലായത്‌.
രണ്ടു ദിവസം മുമ്പായിരുന്നു സംഭവം. ഉച്ചയ്‌ക്ക് പെട്രോളിങിനായി ബീച്ചിലെത്തിയ എസ്‌.ഐ കെ. ഹരീഷും സംഘവും മാണ് ഇവരെ കണ്ടത്.പോലീസ്‌ എത്തിയപ്പോള്‍ ഇരുവരും മദ്യലഹരിയിലായിരുന്നു. പകുതി കാലിയായ ഫുള്‍ ബോട്ടിലും കുപ്പിവെള്ളവും രണ്ട്‌ ഗ്ലാസുകളും ഇരുവരില്‍നിന്നും പിടിച്ചെടുത്തു. തുടര്‍ന്ന്‌ വനിതാ പോലീസിന്റെ സാന്നിദ്ധ്യത്തില്‍ ഇരുവരെയും സ്‌റ്റേഷനിലേക്ക്‌ മാറ്റി.
ഗിരീഷ്‌ ഡ്രൈവറായി ജോലിനോക്കുകയാണ്‌. അധ്യാപികയും ഇയാളും ചെറുപ്പം മുതല്‍ പരിചയക്കാരാണ്‌. പോലീസ്‌ അറിയിച്ചതിനെ തുടര്‍ന്ന്‌ ബന്ധുക്കള്‍ എത്തിയാണ്‌ ഗിരീഷിനെ കൂട്ടിക്കൊണ്ടുപോയത്‌. വീട്ടിലറിഞ്ഞാല്‍ കുടുംബം തകരുമെന്ന അഭ്യര്‍ത്ഥനയില്‍ പരസ്യ മദ്യപാനം ആവര്‍ത്തിക്കില്ലെന്ന്‌ എഴുതിവാങ്ങിയാണ്‌ യുവതിയെ മടക്കിയയച്ചത്‌. സ്വന്തം ജാമ്യത്തില്‍ വിട്ടയച്ച അധ്യാപികയെ മദ്യലഹരിയില്‍നിന്ന്‌ മുക്‌തമായശേഷം കോഴിക്കോട് കെ.എസ്‌.ആര്‍.ടി.സി ബസ്‌ സ്‌റ്റാന്‍ഡിലെത്തിച്ച പോലീസ്‌ മാനന്തവാടി ബസില്‍ കയറ്റിവിടുകയായിരുന്നു.
Post Your Comments