ഭഗത് സിംഗിന്റെ ആദ്യകാല ജീവിതത്തെ കുറിച്ചറിയാം

ഇന്ത്യൻ സ്വാതന്ത്ര്യ സമരത്തിൽ പങ്കെടുത്ത് വീരചരമമടഞ്ഞ ഒരു ധീര വിപ്ലവകാരിയാണ് ഭഗത് സിംഗ്. പഞ്ചാബിലെ ലയൽപൂർ ജില്ലയിലെ ബങ്കാ ഗ്രാമത്തിലെ ഒരു സിഖ് കർഷക കുടുംബത്തിൽ 1907 സെപ്തംമ്പർ 27ന് ആണ് ഭഗത് സിംഗ് ജനിച്ചത്. തന്റെ ഗ്രാ‍മത്തിലെ വിദ്യാലയത്തിൽ നിന്നും അഞ്ചാം തരം പാസ്സായതിനു ശേഷം ലാഹോറിലുള്ള ദയാനന്ദ് ആംഗ്ലോ വേദിക് സ്കൂളിലാണ് ഭഗത് സിംഗ് പഠിച്ചത്. 1920 – ൽ മഹാത്മാഗാന്ധി നിസ്സഹകരണ പ്രസ്ഥാനം തുടങ്ങിയപ്പോൾ 13-മത്തെ വയസ്സിൽ ഭഗത് സിംഗ് പ്രസ്ഥാനത്തിന്റെ സജീവ പ്രവർത്തകനായി. നിസ്സഹകരണത്തിന്റെ ഭാഗമായി അദ്ദേഹം ദയാനന്ദ് ആംഗ്ലോ വേദിക് സ്കൂൾ ഉപേക്ഷിച്ച് ലാഹോറിലുള്ള നാഷണൽ കോളേജിൽ ചേർന്നു.

1924-ൽ അദ്ദേഹത്തിനുവേണ്ടി മാതാപിതാക്കൾ ഒരു വിവാഹാലോചന നടത്തിയെങ്കിലും ഭഗത് സിംഗ് ആ വിവാഹാലോചന നിരസിച്ചു. “ഇന്ത്യ അസ്വതന്ത്രയായിരിക്കുന്നിടത്തോളം എന്റെ വധു മരണം മാത്രമായിരിക്കും” എന്നാണ് അദ്ദേഹം വ്യക്തമാക്കിയത്. വിവാഹം നടത്തുവാനുള്ള മാതാപിതാക്കളുടെ നിർബന്ധത്തിൽ നിന്നും രക്ഷപ്പെടുവാനായി അദ്ദേഹം വീടു വിട്ടു കാൺപൂരിലേക്കു പോയി. അവിടെ പ്രതാപ് പ്രസ്സ് എന്ന ഒരു അച്ചടിശാലയിൽ ജോലിക്കു ചേർന്നു, ഒഴിവു സമയങ്ങളിൽ വിപ്ലവ സാഹിത്യ പഠനവും തുടങ്ങിയതോടെ ഇന്ത്യയുടെ ചരിത്രത്തിന്റെ ഭാഗമാകുകയായിരുന്നു അദ്ദേഹം.