എലി കയറിയതിനാൽ വിമാനം വൈകുന്നു; തിരുവനന്തപുരത്തേക്കുള്ള യാത്രക്കാർ ദുരിതത്തിൽ

ദുബായ്: ഷാര്‍ജയില്‍ നിന്ന്​ വെള്ളിയാഴ്​ച പുലര്‍ച്ചെ 12.05ന്​ തിരുവനന്തപുരത്തേക്ക്​ പുറപ്പെടേണ്ടിയിരുന്ന എയര്‍ ഇന്ത്യ വിമാനം എലി കയറിയതിനാൽ അനിശ്​ചിതമായി വൈകുന്നു. 170 ലേറെ യാത്രക്കാരുമായി പുറപ്പെടേണ്ടിയിരുന്ന എ​.ഐ 968 വിമാനമാണ് വൈകുന്നത്. പരിശോധനകള്‍ കഴിഞ്ഞ്​ ബോര്‍ഡിങ്​ പാസുമായി കാത്തിരിക്കുമ്പോഴാണ് വിമാനം വൈകുമെന്ന അറിയിപ്പ് ലഭിച്ചത്. എന്നാൽ കാരണമെന്തെന്ന് വ്യക്തമാക്കിയിരുന്നില്ല. എന്നാൽ വിമാനത്തില്‍ എലി കയറിയെന്നും അതിനെതിരെ മരുന്നുവെച്ചതിനാല്‍ 10 മണിക്കൂര്‍ കഴിയാതെ വിമാനത്തില്‍ യാത്രക്കാരെ കയറ്റാനാവില്ലെന്നുമാണ് പുറത്തുവരുന്ന റിപ്പോർട്ടുകൾ.

Read Also:പുനഃപരീക്ഷ തീയതി സിബിഎസ്ഇ പ്രഖ്യാപിച്ചു

പുലര്‍ച്ചെ നാലു മണിക്ക്​ പു​റപ്പെടുമെന്ന് അറിയിച്ചിരുന്നെങ്കിലും പിന്നീട് അത് വീണ്ടും വൈകി. സഹോദരന്‍ മരിച്ചതറിഞ്ഞ്​ നാട്ടിലേക്ക്​ പോകുന്നയാളും ഇന്ന്​ വിവാഹ നിശ്​ചയം നടത്തേ​ണ്ട യുവാവും മറ്റൊരു വിമാനത്തിൽ തങ്ങളെ അയക്കണമെന്ന് ആവശ്യപ്പെട്ടെങ്കിലും അധികൃതർ തയ്യാറായില്ല. യാ​​ത്രക്കാരെ അപമാനിക്കുന്ന രീതിയിലാണ് ഉദ്യോഗസ്ഥർ പെരുമാറുന്നതെന്നും പകരം സംവിധാനം ഒരുക്കുന്നില്ലെന്നും യാത്രക്കാർ വ്യക്തമാക്കുന്നു. കുട്ടികളും പ്രായമായവരും ഉള്‍പ്പെടെ ഒ​ട്ടേറെ പേരാണ് ഭക്ഷണവും താമസസൗകര്യങ്ങളുമില്ലാതെ എയർപോർട്ടിൽ കുടുങ്ങിക്കിടക്കുന്നത്.