സര്‍വ്വകക്ഷി യോഗം: കണ്ണൂര്‍ സംഘര്‍ഷത്തിന് അയവുണ്ടാകുന്നു

കണ്ണൂര്‍: കണ്ണൂരിൽ ജില്ലാ കളക്ടർ വിളിച്ച സർവ്വകക്ഷി യോഗത്തിൽ തീരുമാനം. രാഷ്ട്രീയ സംഘർഷങ്ങളവസാനിപ്പിച്ച് ഒരുമിച്ച് നിൽക്കാൻ ജില്ലാ കളക്ടർ വിളിച്ച യോഗത്തിൽ തീരുമാനമായി. സാമൂഹിക മാധ്യമങ്ങൾ വഴി പ്രകോപനങ്ങൾ സൃഷ്ടിച്ചാൽ ഉടനടി നടപടിയെടുക്കാനും തീരുമാനിച്ചിട്ടുണ്ട്. യോഗത്തിൽ ബിജെപി വിട്ടുനിൽക്കാൻ തീരുമാനിച്ചെങ്കിലും അവസാനിമിഷം യോഗത്തിൽ പങ്കുചേർന്നു. എന്നാൽ ഇതേ തുടർന്ന് സിപിഎം പക്ഷത്ത് നിന്ന് പ്രമുഖ നേതാക്കൾ വിട്ടുനിന്നു.

എല്ലാ മാസവും സർവ്വകക്ഷി യോഗം ചേരും. സംഘർഷമുണ്ടായാൽ ഉടനടി യോഗം ചേർന്ന് ആക്രമിക്കപ്പെട്ട ആളുകൾ, വീടുകൾ എന്നിവ ഒരുമിച്ച് സർവ്വകക്ഷി സംഘം സന്ദർശിക്കും. ഏതെങ്കിലും പ്രദേശങ്ങളിൽ അക്രമമുണ്ടായാൽ ആ പ്രദേശത്തെ നേതാക്കൾക്കും ഉത്തരവാദിത്തമുണ്ടാകും. കൂടാതെ വീടാക്രമിച്ചാൽ ജാമ്യമില്ലാ വകുപ്പുകൾ പ്രകാരം കേസെടുക്കാനും, കസ്റ്റഡിയിലെടുത്തവരെ ജാമ്യത്തിലെടുക്കാൻ എത്തുന്നവരെ അറസ്റ്റ് ചെയ്യാനുള്ള നടപടികൾ സ്വീകരിക്കാനും ധാരണയായി.