കോഴിക്കോട് യുവാവിൽ നിന്ന് വെടിയുണ്ടകളും മെറ്റൽ ബോളുകളും പിടികൂടി

കോഴിക്കോട്: തിരുവമ്പാടിയിൽ യുവാവിനെ വെടിയുണ്ടകളുമായി പിടികൂടി. തോക്കിൽ ഉപയോഗിക്കുന്ന 16 വെടിയുണ്ടകളും 755 മെറ്റൽ ബോളുകളും ആണ് പാമ്പിഴഞ്ഞപാറ സ്വദേശിയായ യുവാവിന്റെ വീട്ടിൽ നിന്നും പിടിച്ചെടുത്തത്. ആനന്ദ് രാജ് എന്ന യുവാവിനെയാണ് വീട്ടിലെത്തി വെള്ളയിൽ പോലീസ് പിടികൂടിയത്.

രഹസ്യ വിവരത്തെ തുടർന്നാണ് പ്രതിയുടെ വീട്ടിൽ ഇന്നലെ വൈകുന്നേരം തിരുവമ്പാടി സിഐ അനിൽ കുമാറിന്റെ നേതൃത്വത്തിലുള്ള പൊലീസ് സംഘം പരിശോധന നടത്തുകയായിരുന്നു. ആം ആക്ട് പ്രകാരമുള്ള വിവിധ വകുപ്പുകൾ പ്രതിക്കെതിരെ ചുമത്തിയിട്ടുണ്ട്.

അതേസമയം കഴിഞ്ഞ ദിവസം തോക്കുമായി തിരുവനന്തപുരം മെഡിക്കല്‍ കോളേജിലെത്തിയ പ്രതിക്കായുള്ള അന്വേഷണം പൊലീസ് ഊര്‍ജിതമാക്കിയിരിക്കുകയാണ്. പ്രതി സതീഷ് ശ്രാവണിന്റെ കല്ലമ്പലത്തെ വീട്ടിലെത്തി പരിശോധന നടത്തിയെങ്കിലും പൊലീസിന് ഇയാളെ കണ്ടെത്താനായില്ല. മെഡിക്കല്‍ കോളേജിന് സമീപത്തെ സിസിടിവി ദൃശ്യങ്ങള്‍ പൊലീസ് ശേഖരിച്ചിട്ടുണ്ട്. ദൃശ്യങ്ങളില്‍ സംശയാസ്പദമായി കണ്ട ഒരു വാഹനം കേന്ദ്രീകരിച്ചാണ് അന്വേഷണം പുരോഗമിക്കുന്നത്.