നടി തുനിഷ ശര്‍മയുടെ ശവസംസ്‌കാര ചടങ്ങില്‍ നടന് ഷീസാന് ഖാന്റെ സഹോദരിയും നടിയുമായ ഫലക്ക് നാസും മാതാവും പങ്കെടുത്തു. തുനിഷയുടെ ആത്മഹത്യയുമായി ബന്ധപ്പെട്ട് ഷീസാൻ നിലവിൽ പോലീസ് കസ്റ്റഡിയിലാണ്. ആത്മഹത്യാ പ്രേരണാകുറ്റം ചുമത്തിയാണ് ഷീസാനെ പോലീസ് അറസ്റ്റ് ചെയ്തിരിക്കുന്നത്. അതിനിടെയാണ് ഷീസാന്റെ രണ്ടു സഹോദരിമാരും അമ്മയും തുനിഷയെ അവസാനമായി ഒരു നോക്ക് കാണാനെത്തിയത്. ഇരുവരും തുനിഷയുടെ മൃതദേഹം കണ്ട് നിയന്ത്രണംവിട്ട് പൊട്ടിക്കരയുന്നുണ്ട്.
ഷീസാനും തുനിഷയും പ്രണയത്തിലായിരുന്നുവെന്ന് ഇരുകുടുംബങ്ങള്‍ക്കും അറിയാമായിരുന്നു. തുനിഷയുടെ മരണത്തിന് രണ്ട് ആഴ്ചകള്‍ക്ക് മുന്‍പ് ഷീസാന് പ്രണയം അവസാനിപ്പിച്ചു. പ്രണയം അവസാനിപ്പിക്കാൻ കാരണം മതവും പ്രായവുമാണെന്നായിരുന്നു ഷീസാന്റെ മൊഴി. തുനിഷയുമായുള്ള ബന്ധം മകൻ പൂർണമായും അവസാനിപ്പിച്ച കാര്യം ഷീസാന്റെ കുടുംബത്തിന് അറിയുമായിരുന്നില്ല എന്നും റിപ്പോർട്ടുണ്ട്. തുടര്‍ന്നുള്ള മാനസിക സംഘര്‍ഷത്തെ തുടര്‍ന്നാണ് തുനിഷ ആത്മഹത്യ ചെയ്തതെന്ന് കുടുംബം ആരോപിച്ചു.
വ്യത്യസ്ത മതവിഭാഗത്തില്‍പ്പെട്ടവരാണ് തുനിഷയും ഷീസാനും. ഇരുപതുകാരിയായിരുന്ന തുനിഷയേക്കാള്‍ എട്ട് വയസ്സ് പ്രായക്കൂടുതലുണ്ട് ഷീസാന്. ടെലിവിഷന്‍ സീരിയല്‍ ചിത്രീകരണത്തിനിടെ തുനിഷയും ഷീസാനും വഴക്കുണ്ടായി. ഇടവേളയില്‍ ശുചിമുറിയിലേക്ക് പോയ നടി അവിടെ തൂങ്ങിമരിക്കുകയായിരുന്നു. വിവരമറിഞ്ഞ് സെറ്റിലുള്ളവര്‍ ഉടനടി ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല.
Post Your Comments