തിരുവനന്തപുരം : വാമനപുരം നദിയില്‍ കുളിക്കാനിറങ്ങിയ ഐഐഎസ്ടി വിദ്യാര്‍ത്ഥി മുങ്ങി മരിച്ചു. ചെന്നൈ സ്വദേശി മോഹന്‍ രാജ് സുബ്രഹ്മണ്യനാണ് മരിച്ചത്. ഇന്ന് രാവിലെ എട്ടുമണിയോടെയാണ് യുവാവ് കുളിക്കാനിറങ്ങിയത്.
ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് സ്‌പേയ്‌സ് സയന്‍സ് ആന്‍ഡ് ടെക്‌നോളജിലെ എംടെക് വിദ്യാര്‍ത്ഥിയാണ് മോഹന്‍ രാജ് സുബ്രഹ്മണ്യന്‍. വാമനപുരം നദിയിലെ വിതുര താവയ്ക്കല്‍ വെള്ളച്ചാട്ടത്തിന് സമീപം ഒഴുക്കില്‍പ്പെട്ട് പാറക്കെട്ടില്‍ നിന്ന് തെന്നി വീഴുകയായിരുന്നു. പുഴയില്‍ വീണതോടെ ഒഴുക്കില്‍പ്പെട്ട വിദ്യാര്‍ത്ഥിയെ കാണാതായി.
തുടര്‍ന്ന് അഗ്‌നിരക്ഷാ സേനയും നാട്ടുകാരും ഒരു മണിക്കൂറോളം നടത്തിയ തെരച്ചിലിലാണ് മൃതദേഹം കണ്ടെത്തിയത്. ഇന്നലെ വൈകിട്ട് പ്രദേശത്ത് ശക്തമായ മഴയുണ്ടായിരുന്നു. ഇതേ തുടര്‍ന്ന് പുഴയില്‍ ഒഴുക്ക് കൂടുതലാണെന്ന് നാട്ടുകാര്‍ പറഞ്ഞു.
Post Your Comments