സിനിമ പരാജയപ്പെട്ടാൽ ആഴ്ചകളോളം സമ്മർദ്ദത്തിലാകും: ലാൽ സിംഗ് ഛദ്ദയുടെ പരാജയത്തിന് ശേഷമുള്ള മനസ് തുറന്ന് പറഞ്ഞ് ആമിർ ഖാൻ

മുംബൈ : തന്റെ സിനിമ പരാജയപ്പെടുമ്പോഴെല്ലാം രണ്ടോ മൂന്നോ ആഴ്ച സമ്മർദ്ദത്തിലൂടെ കടന്നുപോകാറുണ്ടെന്ന് നടൻ ആമിർ ഖാൻ. അതിനുശേഷം തെറ്റുകൾ വിശകലനം ചെയ്യാനും അവയിൽ നിന്ന് പഠിക്കാനും തന്റെ ടീമിനൊപ്പം ഇരിക്കുമെന്നും അദ്ദേഹം വ്യക്തമാക്കി. ഒരു സ്വകാര്യ മാധ്യമ പരിപാടിയിൽ സംസാരിക്കവേയാണ് ആമിർ ഖാൻ ഇക്കാര്യം പറഞ്ഞത്.

“എന്റെ സിനിമകൾ പരാജയപ്പെടുമ്പോൾ എനിക്ക് സങ്കടം തോന്നുന്നു, കാരണം ഒരു സിനിമ നിർമ്മിക്കുന്നത് ബുദ്ധിമുട്ടുള്ള ഒരു പ്രക്രിയയാണ്. ചിലപ്പോൾ, കാര്യങ്ങൾ ആസൂത്രണം ചെയ്തതുപോലെ നടക്കില്ല. ‘ലാൽ സിംഗ് ഛദ്ദ’യിലെ എന്റെ പ്രകടനം അൽപ്പം അതിശയോക്തിപരമായിരുന്നു. നായകന്റെ അഭിനയത്തെ വളരെയധികം ആശ്രയിച്ചായിരുന്നു സിനിമ, പക്ഷേ ടോം ഹാങ്ക്സിന്റെ ‘ഫോറസ്റ്റ് ഗമ്പിൽ നിന്ന് വ്യത്യസ്തമായി, അതിന് അതേ വിലയിരുത്തൽ ലഭിച്ചില്ല.” – അദ്ദേഹം പറഞ്ഞു.

ഇതിനു പുറമെ “എന്റെ സിനിമ പരാജയപ്പെടുമ്പോൾ, രണ്ടോ മൂന്നോ ആഴ്ച ഞാൻ സമ്മർദ്ദത്തിലാകും. പിന്നീട്, എന്താണ് തെറ്റ് സംഭവിച്ചതെന്ന് ഞാൻ എന്റെ ടീമുമായി ചർച്ച ചെയ്യുകയും അതിൽ നിന്ന് പഠിക്കുകയും ചെയ്യുന്നു. എന്റെ പരാജയങ്ങളെ ഞാൻ ശരിക്കും ബഹുമാനിക്കുന്നു, കാരണം അവ എന്നെ മികച്ച പ്രകടനം കാഴ്ചവയ്ക്കാൻ പ്രേരിപ്പിക്കുന്നു.” – നടൻ കൂട്ടിച്ചേർത്തു.

‘ലാൽ സിംഗ് ഛദ്ദ’ ഹോളിവുഡ് ചിത്രമായ ‘ഫോറസ്റ്റ് ഗമ്പിന്റെ’ ഹിന്ദി റീമേക്കാണ്. ആമിർ ഖാനും കരീന കപൂറും അഭിനയിച്ച ഈ ചിത്രം വലിയ ബജറ്റിലാണ് നിർമ്മിച്ചത്. 2022 ൽ പുറത്തിറങ്ങിയ ഇതിന് സമ്മിശ്ര പ്രതികരണമാണ് ലഭിച്ചത്. എന്നാൽ ബോക്സ് ഓഫീസിൽ ചിത്രം പരാജയപ്പെട്ടു. അതിനുശേഷം ആമിർ ഖാൻ പുതിയ പ്രോജക്ടുകളൊന്നും തന്നെ ഏറ്റെടുത്തിട്ടില്ല.