കോഴിക്കോട്: പി.എസ്.സി അംഗത്വത്തിന് കോഴവാങ്ങിയെന്ന പരാതി പാര്‍ട്ടിയെ പ്രതിസന്ധിയിലാക്കിയതോടെ ആരോപണവിധേയനായ യുവനേതാവിനെതിരെ സി.പി.എം നടപടിക്ക്. പാര്‍ട്ടി കോഴിക്കോട് ടൗണ്‍ ഏരിയാകമ്മിറ്റി അംഗവും സി.ഐ.ടി.യു. ജില്ലാ സെക്രട്ടറിമാരില്‍ ഒരാളുമായ പ്രമോദ് കോട്ടൂളിയെ സ്ഥാനങ്ങളില്‍നിന്ന് നീക്കാനാണ് തീരുമാനം.
ഇക്കാര്യം ചര്‍ച്ചചെയ്യാനായി തിങ്കളാഴ്ച ചേരാനിരുന്ന ജില്ലാ സെക്രട്ടേറിയറ്റ് യോഗം നടന്നില്ലെങ്കിലും അടുത്തുതന്നെ യോഗംചേര്‍ന്ന് തീരുമാനമെടുക്കും. പി.എസ്.സി. അംഗമാക്കാമെന്ന് വാഗ്ദാനംചെയ്ത് 60 ലക്ഷം രൂപ കോഴയാവശ്യപ്പെട്ടെന്നും ഇതില്‍ 22 ലക്ഷം കൈപ്പറ്റിയെന്നുമാണ് പരാതി. മന്ത്രി പി.എ. മുഹമ്മദ് റിയാസ് വഴി പാര്‍ട്ടി അംഗീകാരം വാങ്ങിനല്‍കാമെന്ന് വിശ്വസിപ്പിച്ചായിരുന്നു ഇടപാട്. ജില്ലയിലെ മറ്റു ചില നേതാക്കളുമായുള്ള ബന്ധവും ഇതിനായി ഉപയോഗിച്ചെന്നും പരാതിയിലുണ്ട്.
ഇക്കാര്യം അന്വേഷിക്കണമെന്ന് മുഹമ്മദ് റിയാസുതന്നെ ആവശ്യപ്പെട്ടിരുന്നു. പാര്‍ട്ടി നടത്തിയ അന്വേഷണത്തില്‍ ഇടപാടിന്റെ കാര്യങ്ങള്‍ സ്ഥിരീകരിച്ചു. പണം തിരിച്ചുകൊടുത്ത് പരാതി ഒത്തുതീര്‍പ്പാക്കാനുള്ള ശ്രമംനടക്കുന്നതിനിടെയാണ് വിവരം പുറത്തായത്.
ഇടപാടിനുപിന്നില്‍ പ്രമോദ് തനിച്ചല്ലെന്ന സംസാരം പാര്‍ട്ടിവൃത്തങ്ങളിലുണ്ടെങ്കിലും മറ്റാരുടെയും പങ്കിനെക്കുറിച്ച് അന്വേഷിച്ചിട്ടില്ല. ആരോപണവിധേയനായ പ്രമോദ് കോഴിക്കോട്ടെ രണ്ട് പ്രധാന നേതാക്കളുടെ അടുത്തയാളാണെങ്കിലും ഇവരിലേക്കും അന്വേഷണമെത്തിയില്ല. കൂടുതല്‍പ്പേര്‍ക്ക് പങ്കുണ്ടോയെന്ന് പരിശോധിക്കണമെന്ന ആവശ്യവും പരിഗണിക്കപ്പെട്ടില്ല.
ഒത്തുതീര്‍പ്പുശ്രമം വിജയത്തിലേക്കെത്താറായപ്പോള്‍ കോഴവാങ്ങിയ വിവരം പുറത്തുവന്നതിനു പിന്നില്‍ പാര്‍ട്ടിയിലെ വിഭാഗീയതയാണെന്നാണ് പൊതുവേയുള്ള വിലയിരുത്തല്‍.
Post Your Comments