വിവാഹത്തിന് തിളങ്ങാൻ മികച്ച പുഞ്ചിരി ലഭിക്കാനുള്ള ശസ്ത്രക്രിയ: യുവാവിന് ദാരുണാന്ത്യം

ഹൈദരാബാദ്: വിവാഹത്തോടനുബന്ധിച്ച് സ്വന്തം ചിരി ഒന്ന് മിനുക്കാൻ ശസ്ത്രക്രിയ നടത്തിയ യുവാവിന് ദാരുണാന്ത്യം. ഹൈദരാബാദ് സ്വദേശിയായ ലക്ഷ്മി നാരായണ വിഞ്ജം ആണ് മരണപ്പെട്ടത്. 28 വയസായിരുന്നു. അമിതമായി അനസ്തേഷ്യ നൽകിയതാണ് ലക്ഷ്മി നാരായണ മരിക്കാൻ ഇടയായതെന്ന് യുവാവിന്റെ പിതാവ് ആരോപിച്ചു. ഫെബ്രുവരി 16 ന് ഹൈദരാബാദിലെ ജൂബിലി ഹിൽസിലെ എഫ്എംഎസ് ഇൻ്റർനാഷണൽ ഡെൻ്റൽ ക്ലിനിക്കിൽ വെച്ചായിരുന്നു യുവാവിന്റെ ‘സ്മൈൽ ഡിസൈനിംഗ്’ ശസ്ത്രക്രിയ.

ശസ്ത്രക്രിയയ്ക്കിടെ മകൻ ബോധരഹിതനായതിനെ തുടർന്ന് ജീവനക്കാർ വിളിച്ച് തന്നോട് ക്ലിനിക്കിലേക്ക് വരാൻ പറഞ്ഞതായി രാമുലു വിഞ്ജം പറഞ്ഞു. ക്ലിനിക്കിൽ നിന്നും അവനെ മികച്ച ആശുപത്രിയിൽ എത്തിച്ചെങ്കിലും അവന്റെ ജീവൻ രക്ഷിക്കാൻ കഴിഞ്ഞില്ലെന്ന് പിതാവ് രാമുലു പറയുന്നു. ശസ്ത്രക്രിയയെക്കുറിച്ച് മകൻ തങ്ങളെ ഒന്നും അറിയിച്ചിരുന്നില്ലെന്നും അദ്ദേഹം പറഞ്ഞു. അദ്ദേഹത്തിന് ആരോഗ്യപ്രശ്നങ്ങളൊന്നും ഉണ്ടായിരുന്നില്ല, അദ്ദേഹത്തിൻ്റെ മരണത്തിന് ഡോക്ടർമാരാണ് ഉത്തരവാദികളെന്ന് പിതാവ് ആരോപിച്ചു.

ഫെബ്രുവരി 16ന് ഉച്ചയ്ക്ക് 2.30ഓടെ ലക്ഷ്മി നാരായണ ക്ലിനിക്കിൽ എത്തിയതായി ജൂബിലി ഹിൽസിലെ സ്റ്റേഷൻ ഹൗസ് ഓഫീസർ കെ വെങ്കിടേശ്വർ റെഡ്ഡി എൻഡിടിവിയോട് പറഞ്ഞു.

‘വൈകിട്ട് 4.30 ഓടെ ഓപ്പറേഷൻ തിയേറ്ററിലേക്ക് കൊണ്ടുപോയി, നടപടിക്രമങ്ങൾ ഏകദേശം രണ്ട് മണിക്കൂറോളം നീണ്ടുനിന്നു. വൈകുന്നേരം ഏഴ് മണിയോടെ അവർ പിതാവിനെ വിളിച്ചു. തുടർന്ന് ജൂബിലി ഹിൽസിലെ അപ്പോളോ ആശുപത്രിയിൽ എത്തിച്ചു. എന്നാൽ അവിടെ ത്തിയപ്പോഴേക്കും അദ്ദേഹം മരണപ്പെട്ടു’, ശ്രീ റെഡ്ഡി പറഞ്ഞു.

മൃതദേഹം പോസ്റ്റ്‌മോർട്ടത്തിനായി അയച്ചിട്ടുണ്ടെന്നും അദ്ദേഹം പറഞ്ഞു. ഒരാഴ്ച മുമ്പ് ലക്ഷ്മി നാരായണയുടെ വിവാഹ നിശ്ചയം കഴിഞ്ഞിരുന്നു. അടുത്ത മാസം വിവാഹം നടക്കാനിരിക്കുകയായിരുന്നു. വീട്ടുകാരുടെ പരാതിയെത്തുടർന്ന് ക്ലിനിക്കിനെതിരെ അനാസ്ഥയ്ക്ക് കേസെടുത്തു. ആശുപത്രി രേഖകളും സുരക്ഷാ ക്യാമറ ദൃശ്യങ്ങളും പരിശോധിച്ച് വരികയാണെന്ന് അധികൃതർ പറഞ്ഞു.

എഫ്എംഎസ് ഇൻ്റർനാഷണൽ, അതിൻ്റെ വെബ്‌സൈറ്റിൽ, 2017 മുതൽ 55-ലധികം അവാർഡുകളുള്ള ഇന്ത്യയിൽ ഏറ്റവും കൂടുതൽ അവാർഡ് ലഭിച്ച ഡെൻ്റൽ ക്ലിനിക്കുകളിലൊന്നാണ് തങ്ങളെന്ന് അവകാശപ്പെടുന്നു. സംഭവത്തിൽ ആശുപത്രി മാനേജ്‌മെന്റ് ഇതുവരെ പ്രതികരിച്ചിട്ടില്ല.