കോഴിക്കോട്: നവകേരള സദസിനെതിരെ സമസ്ത രംഗത്ത്. സദസ് ആരെ കബളിപ്പിക്കാനാണെന്ന് സമസ്ത മുഖപത്രമായ സുപ്രഭാതത്തില്‍ മുഖപ്രസംഗം. ലോക്‌സഭ തെരെഞ്ഞെടുപ്പ് ലക്ഷ്യം വെക്കുന്നതാണ് പരിപാടിയെന്ന പ്രതിപക്ഷ ആരോപണം ശരിവെക്കുന്നതാണ് നവകേരള സദസെന്നും മുഖപ്രസംഗത്തില്‍ കുറ്റപ്പെടുത്തുന്നു. സംസ്ഥാനസര്‍ക്കാരുമായും ഇടതുപക്ഷവുമായും സമസ്ത കൂടുതലടുക്കുന്നു എന്ന ഒരു വിഭാഗം മുസ്ലീം ലീഗ് നേതാക്കളുടെ നിരന്തര ആരോപണങ്ങള്‍ക്കിടെയാണ് സര്‍ക്കാരിനെ രൂക്ഷമായി വിമര്‍ശിച്ചുകൊണ്ട് സമസ്ത മുഖപത്രത്തിലെ മുഖപ്രസംഗം.
കര്‍ഷക ആത്മഹത്യ നടക്കുമ്പോഴും നിത്യ ചെലവിന് വഴികണ്ടെത്താന്‍ ബുദ്ധിമുട്ടുമ്പോഴും 100 കോടിരൂപ ചെലവിട്ട് എന്തിനാണ് ജനസദസ് എന്നും സമസ്ത വിമര്‍ശിക്കുന്നു. ലോക്‌സഭ തെരഞ്ഞെടുപ്പ് ലക്ഷ്യം വച്ചുളള കണ്‍കെട്ട് വിദ്യയെന്ന് പറയുന്ന മുഖപ്രസംഗത്തില്‍ സര്‍ക്കാര്‍ കൊടുത്തുതീര്‍ക്കാനുളള ക്ഷേമപെന്‍ഷന്റെ കണക്കുവരെ സമസ്ത വിശദമായി നല്‍കിയിട്ടുണ്ട്.
Post Your Comments