ഇത് ഒരു നീണ്ട യുദ്ധമായിരിക്കുമെന്ന് നെതന്യാഹു; നിങ്ങളാണ് ജയിക്കേണ്ടതെന്ന് ഋഷി സുനക്

ടെൽ അവീവ്: യു.എസ് പ്രസിഡന്റ് ജോ ബൈഡന് പിന്നാലെ ബ്രിട്ടീഷ് പ്രധാനമന്ത്രി ഋഷി സുനക് വ്യാഴാഴ്ച ഇസ്രായേൽ സന്ദർശിച്ചിരുന്നു. ഹമാസുമായുള്ള യുദ്ധത്തിൽ ഏർപ്പെട്ട ഇസ്രായേലിന് പൂർണ പിന്തുണ നൽകാനായിഉർന്നു സുനക് രാജ്യത്തെത്തിയത്. ഇസ്രായേലിന്റെ ഇരുണ്ട മണിക്കൂറിൽ ബ്രിട്ടൻ ഒപ്പം നിൽക്കുമെന്ന് ഋഷി സുനക് പറഞ്ഞു. ഹമാസിനെതിരായ യുദ്ധത്തിൽ ഇസ്രായേൽ പലസ്തീനികളെ കൂട്ടമായി ശിക്ഷിക്കുകയാണെന്ന് ഓസ്‌ട്രേലിയൻ സർക്കാർ ഇന്ന് ആരോപിച്ചു.

‘ജനങ്ങളെ അപകടത്തിലാക്കാൻ ശ്രമിക്കുന്ന ഹമാസിന്റെ ഭീകരർക്ക് നേർ വിപരീതമായി സാധാരണക്കാരെ ഉപദ്രവിക്കാതിരിക്കാൻ നിങ്ങൾ എല്ലാ മുൻകരുതലുകളും എടുക്കുന്നുവെന്ന് എനിക്കറിയാം. ഗാസയിലേക്കുള്ള വഴികൾ മാനുഷിക സഹായത്തിനായി തുറന്ന് കൊടുക്കുമെന്ന് ഉറപ്പുവരുത്താൻ നിങ്ങൾ എടുത്ത ഇന്നലെ നിങ്ങളുടെ തീരുമാനത്തെ ഞാൻ സ്വാഗതം ചെയ്യുന്നു. ഇവിടെ നിങ്ങളോടൊപ്പം നിൽക്കുന്നതിൽ ഞാൻ അഭിമാനിക്കുന്നു. ഇസ്രായേലിന്റെ ഇരുണ്ട മണിക്കൂറിൽ നിങ്ങളുടെ സുഹൃത്തെന്ന നിലയിൽ, ഞങ്ങൾ നിങ്ങളോടൊപ്പം നിൽക്കും. ഐക്യദാർഢ്യം, ഞങ്ങൾ നിങ്ങളുടെ ജനങ്ങൾക്കൊപ്പം നിൽക്കും, നിങ്ങൾ വിജയിക്കണമെന്നും ഞങ്ങൾ ആഗ്രഹിക്കുന്നു’, സുനക് ജറുസലേമിൽ ബെഞ്ചമിൻ നെതന്യാഹുവിനെ നേരിൽ കണ്ട് അറിയിച്ചു.

ഒക്‌ടോബർ ഏഴിന് ഹമാസ് ഭീകരർ നടത്തിയ ആക്രമണം മിഡിൽ ഈസ്റ്റിലെ സമാധാനപരമായ ബന്ധം വിപുലീകരിക്കുന്നത് തടയാൻ ലക്ഷ്യമിട്ടാണെന്ന് ബെഞ്ചമിൻ നെതന്യാഹു റിഷി സുനക്കിനോട് പറഞ്ഞു. ഇത് തങ്ങളുടെ ഇരുണ്ട മണിക്കൂറാണെന്നും ഇതൊരു നീണ്ട യുദ്ധമാണ് എന്നും നെതന്യാഹു കൂട്ടിച്ചേർത്തു.

അതേസമയം, ബുധനാഴ്ച ഗാസയിലെ ഒരു ആശുപത്രിയിൽ നടന്ന സ്ഫോടനം നൂറുകണക്കിന് ആളുകൾ കൊല്ലപ്പെടാൻ കാരണമായി. സ്‌ഫോടനം വിലയിരുത്തിയ വൈറ്റ് ഹൗസ്, ഗാസയിലെ ഒരു ഭീകരസംഘം തൊടുത്തുവിട്ട റോക്കറ്റിന്റെ ഫലമായാണ് ഗാസ ആശുപത്രിയിൽ സ്‌ഫോടനം നടന്നതെന്ന് വിശകലനം ചെയ്തു. ചൊവ്വാഴ്ച രാത്രി നടന്ന സ്ഫോടനത്തിന് പിന്നിൽ ആരാണെന്ന് പരസ്പരവിരുദ്ധമായ അവകാശവാദങ്ങൾ ഉണ്ടായിരുന്നു. എന്നാൽ ഇസ്രായേലാണ് ഉത്തരവാദിയെന്ന് പല അറബ് നേതാക്കളും പറഞ്ഞതോടെ മേഖലയിൽ പ്രതിഷേധം പെട്ടെന്ന് പൊട്ടിപ്പുറപ്പെട്ടു. ഗാസയിലെ ഹമാസ് ഉദ്യോഗസ്ഥർ വ്യോമാക്രമണത്തിൽ ഇസ്രയേലിനെ കുറ്റപ്പെടുത്തി. എന്നാൽ, ഇസ്രായേൽ ഇത് നിഷേധിച്ചു.

ഗാസയിൽ പ്രവർത്തിക്കുന്ന മറ്റൊരു ഭീകരസംഘടനയായ ഇസ്ലാമിക് ജിഹാദിന്റെ റോക്കറ്റ് മിസ്‌ഫയർ മൂലമാണ് സ്‌ഫോടനം നടന്നതെന്ന് കാണിക്കുന്ന വീഡിയോ, ഓഡിയോ, മറ്റ് വിവരങ്ങൾ എന്നിവ ഇസ്രായേൽ പുറത്തുവിട്ടു. ഇസ്ലാമിക് ജിഹാദ് ആ വാദം തള്ളിക്കളഞ്ഞു.