യൂറോപ്യൻ യാത്ര ഇനി ബഡ്ജറ്റിൽ ഒതുങ്ങും! ഞെട്ടിപ്പിക്കുന്ന ഓഫറുമായി എയർ ഇന്ത്യ

യൂറോപ്യൻ നഗരങ്ങൾ ചുറ്റിക്കറങ്ങുക എന്നത് മിക്ക യാത്ര പ്രേമികളുടെയും സ്വപ്നങ്ങളിൽ ഒന്നാണ്. അത്തരത്തിൽ യൂറോപ്പിലേക്ക് യാത്ര പ്ലാൻ ചെയ്യുന്നവർക്ക് സുവർണാവസരവുമായി എത്തിയിരിക്കുകയാണ് രാജ്യത്തെ പ്രമുഖ എയർലൈനായ എയർ ഇന്ത്യ. അന്താരാഷ്ട്ര യാത്രകൾക്കായി ഞെട്ടിപ്പിക്കുന്ന ഓഫറുകളാണ് എയർ ഇന്ത്യ ഇത്തവണ ഒരുക്കിയിരിക്കുന്നത്. യുകെ ഉൾപ്പെടെ യൂറോപ്പിലെ അഞ്ച് നഗരങ്ങളിലേക്കുള്ള തിരഞ്ഞെടുത്ത റൂട്ടുകളിൽ വൻ കിഴിവാണ് എയർ ഇന്ത്യ വാഗ്ദാനം ചെയ്യുന്നത്.

എയർ ഇന്ത്യയുടെ ഏറ്റവും പുതിയ ഓഫർ അനുസരിച്ച്, കോപ്പൻഹേഗൻ (ഡെൻമാർക്ക്), ലണ്ടൻ ഹീത്രൂ (യുകെ), മിലാൻ (ഇറ്റലി), പാരീസ് (ഫ്രാൻസ്), വിയന്ന (ഓസ്ട്രിയ) എന്നീ നഗരങ്ങളിലേക്കുളള അപ്പ് ആൻഡ് ഡൗൺ ടിക്കറ്റ് നിരക്ക് ഏതാണ്ട് 40000 രൂപയോളമാണ്. അതേസമയം, വൺവേ ഓപ്ഷൻ മാത്രമാണ് തിരഞ്ഞെടുക്കുന്നതെങ്കിൽ 25000 രൂപ മതിയാകും. ഒക്ടോബർ 14 വരെ മാത്രമാണ് ഈ സ്പെഷ്യൽ ഓഫറുകൾ ലഭിക്കുകയുള്ളൂ. ഡിസംബർ 15 മുതലാണ് ഓഫർ നിരക്കിൽ ഉള്ള യൂറോപ്യൻ യാത്ര ആരംഭിക്കുക.

Also Read: ഗൂഗിൾ ക്രോം ഇനിയും അപ്ഡേറ്റ് ചെയ്തില്ലേ? പഴയ വേർഷൻ ഉപയോഗിക്കുന്നവർക്ക് മുന്നറിയിപ്പുമായി സെർട്ട്-ഇൻ

സീറ്റുകൾ പരിമിതമായതിനാൽ, ഉപഭോക്താക്കൾ ഉടൻ തന്നെ ടിക്കറ്റുകൾ ബുക്ക് ചെയ്യേണ്ടതാണ്. എയർ ഇന്ത്യയുടെ ഔദ്യോഗിക വെബ്സൈറ്റ്, ആൻഡ്രോയിഡ്, ഐഒഎസ് മൊബൈൽ ആപ്പുകൾ, അംഗീകൃത ട്രാവൽ ഏജന്റുമാർ എന്നിവ മുഖാന്തരം ടിക്കറ്റുകൾ ബുക്ക് ചെയ്യാവുന്നതാണ്. യൂറോപ്പിലെ ഓരോ നഗരങ്ങളിലും ബാധകമായ വിനിമയ നിരക്കുകളും നികുതികളും കാരണം, ടിക്കറ്റ് നിരക്കുകളിൽ നേരിയ മാറ്റങ്ങൾ ഉണ്ടായേക്കുമെന്ന് എയർ ഇന്ത്യ വ്യക്തമാക്കിയിട്ടുണ്ട്.