റിസർവ് ബാങ്ക് അസിസ്റ്റന്റ് പരീക്ഷാ തീയതികളിൽ മാറ്റം: പുതുക്കിയ തീയതികൾ പ്രസിദ്ധീകരിച്ചു

റിസർവ് ബാങ്ക് ഓഫ് ഇന്ത്യയുടെ അസിസ്റ്റന്റ് തസ്തികയിലേക്കുള്ള പരീക്ഷാ തീയതികളിൽ മാറ്റം. നിലവിൽ, പരിഷ്കരിച്ച പരീക്ഷാ തീയതികൾ ആർബിഐ പുറത്തുവിട്ടിട്ടുണ്ട്. ഏറ്റവും പുതിയ വിജ്ഞാപനം അനുസരിച്ച്, ഓൺലൈൻ പ്രിലിമിനറി പരീക്ഷ നവംബർ 18, 19 തീയതികളിലാണ് നടക്കുക. തുടർന്ന് മെയിൻ പരീക്ഷ ഡിസംബർ 31ന് നടത്തും. പുതുക്കിയ പരീക്ഷ തീയതിയുമായി ബന്ധപ്പെട്ടുള്ള കൂടുതൽ വിവരങ്ങൾ റിസർവ് ബാങ്കിന്റെ ഔദ്യോഗിക വെബ്സൈറ്റിൽ പ്രസിദ്ധീകരിച്ചിട്ടുണ്ട്. ഇത് ഉദ്യോഗാർത്ഥികൾക്ക് പരിശോധിക്കാവുന്നതാണ്.

നേരത്തെ ഒക്ടോബർ 21, 23 തീയതികളിലാണ് പ്രിലിമിനറി പരീക്ഷ നടത്താൻ തീരുമാനിച്ചിരുന്നത്. മെയിൻ പരീക്ഷയുടെ തീയതി ഡിസംബർ രണ്ടിന് ആയിരുന്നു. ഈ തീയതികളാണ് ഇപ്പോൾ റിസർവ് ബാങ്ക് പരിഷ്ക്കരിച്ചിരിക്കുന്നത്. അസിസ്റ്റന്റ് തസ്തികയിലേക്കുള്ള പരീക്ഷയ്ക്ക് അപേക്ഷിക്കാനുള്ള അവസാന തീയതി ഒക്ടോബർ നാലിനാണ് അവസാനിച്ചത്. ഉദ്യോഗാർത്ഥികൾ ഏറെ കാത്തിരുന്ന തസ്തികകളിൽ ഒന്നാണ് റിസർവ് ബാങ്ക് അസിസ്റ്റന്റ്.

Also Read: സംസ്ഥാനത്ത് ഇന്നുമുതൽ തുലാവർഷം സജീവമായേക്കും: 3 ജില്ലകളിൽ യെല്ലോ അലർട്ട് പ്രഖ്യാപിച്ചു