തൃശൂര്‍: ജോലിക്ക് പോയി തിരികെ എത്തിയപ്പോള്‍ വീടിന് ഗേറ്റില്ലെന്ന് കണ്ട് അമ്പരന്ന് വീട്ടുകാര്‍. പരാതിക്ക് പിന്നാലെ മണിക്കൂറുകള്‍ക്കകം മോഷ്ടാക്കളെ തിരഞ്ഞ് പിടിച്ച് പൊലീസ്.
മുളങ്കുന്നത്തുകാവ്, വളപ്പായ റോഡ് എന്നിവിടങ്ങളില്‍ നിന്ന് ആള്‍താമസമുള്ള വീടിനു മുന്‍വശം ഉറപ്പിച്ചിരുന്ന ഇരുമ്പ് ഗേറ്റുകള്‍ ഓട്ടോയില്‍ വന്ന രണ്ടംഗ സംഘം കയറ്റിക്കൊണ്ടുപോകുകയായിരുന്നു.
രാവിലെ ജോലിക്കുപോയി തിരികെ വീട്ടിലെത്തിയപ്പോള്‍ വീടിനു മുന്നില്‍ ഗേറ്റുകളില്ലാത്തത് വീട്ടുകാരെ പരിഭ്രാന്തിയിലാക്കി. മെഡിക്കല്‍ കോളജ് പോലീസിന്റെ നേതൃത്വത്തിലുള്ള അന്വേഷണ സംഘമാണ് മോഷണം പ്രതികളെ കണ്ടെത്തിയത്. ഒളരിക്കര ശാന്തിനഗറില്‍ കോലാടി വീട്ടില്‍ ഷിജോ ( 31), നെല്ലിക്കുന്ന് തുണ്ടപ്പറമ്പില്‍ ബിനോയ് ( 36) എന്നിവരെയാണ് മെഡിക്കല്‍ കോളജ് എസ്എച്ച്ഒ പിപി ജോയ് അറസ്റ്റ് ചെയ്തത്.
സിസിടിവിയിലെ ദൃശ്യങ്ങള്‍ പരിശോധിച്ചാണ് പൊലീസ് പ്രതികളിലേക്കെത്തിയത്. ഇവര്‍ സഞ്ചരിച്ച ഓട്ടോയും പൊലീസ് കസ്റ്റഡയിലെടുത്തു. ഗേറ്റുകള്‍ പട്ടാമ്പി ആക്രിക്കടയില്‍ നിന്നും കണ്ടെടുത്തു. പ്രതികള്‍ മുമ്പും സമാനരീതിയിലുള്ള മോഷണങ്ങള്‍ നടത്തിയിട്ടുണ്ടെന്നു പൊലീസ് പറഞ്ഞു. അന്വേഷണ സംഘത്തില്‍ എസ്ഐ ബാലസുബ്രഹ്മണ്യന്‍, എസ്ഐ ശിവദാസന്‍, പൊലീസുകാരായ അഖില്‍, വിഷ്ണു, അഭീഷ്, രഞ്ജിത് എന്നിവരും ഉണ്ടായിരുന്നു.
Post Your Comments