ഗുരുവായൂര്‍: കോട്ടപ്പടിയില്‍ മരം മുറിക്കുന്നതിനിടെ സ്റ്റേ കമ്പിയില്‍ നിന്നും വൈദ്യുതാഘാതമേറ്റ് തൊഴിലാളി മരിച്ചു. കോട്ടപ്പടി ചേമ്പാലകുളങ്ങര ക്ഷേത്രത്തിന് സമീപം കൊഴക്കി വീട്ടില്‍ നാരായണൻ (46) ആണ് മരിച്ചത്.
ഇന്നലെ വൈകുന്നേരം നാലോടെയായിരുന്നു അപകടം. കോട്ടപ്പടി സെന്‍ററില്‍ ഗുരുവായൂര്‍ അർബൻ കോപ്പറേറ്റീവ് ബാങ്ക് ബ്രാഞ്ചിനു സമീപമുള്ള സ്വകാര്യവ്യക്തിയുടെ പറമ്പിലെ പൂമരം മുറിക്കുന്നതിനിടെയായിരുന്നു അപകടം നടന്നത്.
നേരത്തെ മരം മുറിക്കുന്നതിനായി വൈദ്യുതി വകുപ്പ് ഉദ്യോഗസ്ഥരെത്തി ഇതിലൂടെയുള്ള വൈദ്യുതി പ്രവാഹം നിര്‍ത്തിവച്ചിരുന്നതാണ്. മരത്തിന്‍റെ ഉയര്‍ന്ന ഭാഗങ്ങള്‍ മുഴുവന്‍ മുറിച്ചുമാറ്റിയശേഷമായിരുന്നു വൈദ്യുതി പുനഃസ്ഥാപിച്ചത്. എന്നാല്‍, മരം മുറിക്കുന്നതിനിടെ കമ്പുകള്‍ വീണ് സ്റ്റേ കമ്പി വൈദ്യുതി കമ്പികളുമായി മുട്ടികിടന്നതാകാം അപകടകാരണമെന്ന് പ്രാഥമിക നിഗമനം.
വൈദ്യുതാഘാതമേറ്റ് തെറിച്ചുവീണ നാരായണനെ കുന്നംകുളത്തെ സ്വകാര്യ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. മൃതദേഹം ആശുപത്രി മോർച്ചറിയിൽ സൂക്ഷിച്ചിരിക്കുകയാണ്.
Post Your Comments