ചാവക്കാട് ഓട്ടോറിക്ഷയിൽ കടത്തിയ കഞ്ചാവ് പൊലീസ് പിടികൂടി, രണ്ട് പേര്‍ അറസ്റ്റില്‍ 

തൃശൂർ: ചാവക്കാട് ഓട്ടോറിക്ഷയിൽ കടത്തിയ കഞ്ചാവുമായി രണ്ടു പേര്‍ പിടിയില്‍. ഒന്നേകാൽ കിലോ കഞ്ചാവ് ആണ് പൊലീസ് പിടിച്ചെടുത്തത്. സംഭവത്തില്‍ കടപ്പുറം തൊട്ടാപ്പ് സ്വദേശി സജിത് കുമാർ (35), ഒറ്റപ്പാലം മുഹമ്മദ് മുസ്തഫ (21) എന്നിവര്‍ അറസ്റ്റില്‍ ആയി. ചാവക്കാട് പൊലീസ് ആണ് പ്രതികളെ പിടികൂടിയത്. ആറ് ക്രിമിനൽ കേസുകളിൽ പ്രതിയാണ് പിടിയിലായ സജിത് കുമാറെന്ന് പൊലീസ് വ്യക്തമാക്കി.

അതേസമയം, ആലപ്പുഴയിൽ കഞ്ചാവുമായി മൂന്ന് യുവാക്കള്‍ പിടിയിലായിരുന്നു. കായംകുളം എക്സൈസ് റേഞ്ച് സംഘവും, ആലപ്പുഴ എക്സൈസ് ഇന്റലിജൻസ് സംഘവും സംയുക്തമായി പുല്ലുകുളങ്ങരയ്ക്ക് പടിഞ്ഞാറ് ഷാപ്പ് മുക്ക് ഭാഗത്ത് നടത്തിയ പരിശോധനയിലാണ് പ്രതികൾ പിടിയിലായത്.

ഇടുക്കി തൊടുപുഴ സ്വദേശികളായ കളപ്പുരക്കൽ വീട്ടിൽ മനു (28), ഒറ്റ പ്ലാക്കിൽ വീട്ടിൽ ആദർശ് (20), തെക്കേ മുരിഞ്ഞുർവീട്ടിൽ ആസാദ് (31) എന്നിവരാണ് പിടിയിലായത്.