ഖത്തറിൽ ജർമ്മനിയ്ക്ക് ആശ്വാസ സമനില: ഇ ഗ്രൂപ്പിൽ ഇനി തീപ്പാറും പോരാട്ടങ്ങൾ!

ദോഹ: ഖത്തർ ലോകകപ്പിലെ ​ഗ്രൂപ്പ് ഇയിൽ ജർമ്മനി-സ്പെയിൻ മത്സരം സമനിലയിൽ. ഇരുടീമുകളും ഓരോ ഗോൾ വീതം നേടി. സ്‌പെയിനിനായി അൽവാരോ മൊറാട്ടയും ജർമ്മനിക്കായി നിക്ലാസ് ഫുൾക്രൂഗുമാണ് ​ഗോൾ നേടിയത്. അന്റോണിയോ റൂഡിഗർ ജർമ്മനിക്കായി പന്ത് വലയിലാക്കിയെങ്കിലും റഫറി ഓഫ്സൈഡ് വിധിച്ചു. ലോകകപ്പിലെ ആദ്യ മത്സരത്തിൽ തോറ്റ ജർമ്മനിക്കിത് നിലനിൽപ്പിന്റെ പോരാട്ടമായിരുന്നു. ആദ്യ മത്സരത്തിൽ ജർമ്മനി, ജപ്പാനോട് 1-2 ന് തോറ്റിരുന്നു.

ആദ്യ പകുതി ഗോൾ രഹിതസമനിലയിൽ കലാശിച്ചപ്പോൾ, ഗോളിനായുള്ള കാത്തിരിപ്പ് 62-ാം മിനിറ്റിൽ അൽവാരോ മൊറാട്ട അവസാനിപ്പിക്കുകയായിരുന്നു. തിരിച്ചടിക്കാൻ ജർമ്മനി അടവുകൾ മുഴുവൻ പുറത്തെടുത്തതോടെ 83-ാം മിനിറ്റിൽ ജർമനിയുടെ രക്ഷകനായി നിക്ലാസ് ഫുൾക്രൂഗ് അവതരിച്ചു. ഇരു ടീമുകളും അവസരങ്ങള്‍ ഏറെ പാഴാക്കിയതോടെ മത്സരം സമനിലയിൽ കലാശിച്ചു.

ഇ ഗ്രൂപ്പിലെ നാല് ടീമുകൾക്കും പ്രീ ക്വാര്‍ട്ടര്‍ സാധ്യതയുണ്ട്. വ്യാഴാഴ്ചത്തെ അവസാന മത്സരങ്ങളാകും ഗ്രൂപ്പ് ജേതാക്കളെ നിര്‍ണയിക്കുക. രണ്ട് മുന്‍ ലോക ചാമ്പ്യന്മാരുള്‍പ്പെട്ട ഇ ഗ്രൂപ്പില്‍ നിലവില്‍ മുന്നിൽ സ്പെയിനാണ്. രണ്ട് കളിയിൽ 4 പോയിന്‍റുള്ള സ്പെയിന് ഗോള്‍ ശരാശരിയിൽ വ്യക്തമായ മേൽക്കൈയുണ്ട്.

Read Also:- ല​ഹ​രി​സം​ഘത്തിന്റെ അ​ഴി​ഞ്ഞാ​ട്ടം, ബസ് തല്ലിതകർത്തു : മൂ​ന്നു​പേ​ർ അ​റ​സ്റ്റി​ൽ

ഓരോ ജയം വീതം നേടിയ ജപ്പാനും കോസ്റ്ററിക്കയും 3 പോയിന്‍റ് വീതവുമായി യഥാക്രമം രണ്ടും മൂന്നും സ്ഥാനങ്ങളില്‍ നില്‍ക്കുന്നു. സ്പെയിനെ സമനിലയിൽ തളച്ചതോടെ ജര്‍മ്മനി അക്കൗണ്ട് തുറന്നു. വ്യാഴാഴ്ചത്തെ അവസാന റൗണ്ടിൽ ജര്‍മ്മനിക്ക് കോസ്റ്റാറിക്കയും സ്പെയിന് ജപ്പാനുമാണ് എതിരാളികള്‍.