മസ്‌കത്ത്: പൊതുഅവധി പ്രഖ്യാപിച്ച് ഒമാൻ. ദേശീയ ദിനത്തോട് അനുബന്ധിച്ചാണ് ഒമാൻ പൊതു അവധി പ്രഖ്യാപിച്ചത്. നവംബർ 30, ഡിസംബർ ഒന്ന് തീയതികളിൽ സർക്കാർ, സ്വകാര്യ മേഖലകളിൽ പൊതുഅവധി ആയിരിക്കും. വാരാന്ത്യ അവധി ഉൾപ്പടെ നാലു ദിവസം തുടർച്ചയായ അവധി ലഭിക്കും.
ദേശീയ ദിനത്തോട് അനുബന്ധിച്ച് വലിയ ആഘോഷപരിപാടികളാണ് ഒമാൻ ഒരുക്കിയിട്ടുള്ളത്. ദേശീയ ദിനാഘോഷങ്ങളുടെ ഭാഗമായി മസ്‌കത്ത് ഗവർണറേറ്റിൽ വെള്ളിയാഴ്ച നടക്കുന്ന പ്രധാന പരിപാടികൾ നഗരസഭ പ്രഖ്യാപിച്ചിട്ടുണ്ട്. ലേസർ, പട്ടം ഷോകളാണ് ഇത്തവണത്തെ ആഘോഷങ്ങൾ കൂടുതൽ വർണാഭമാക്കുന്നത്. ഇവയുടെ മുന്നൊരുക്കങ്ങൾ പൂർത്തിയായി. ആഘോഷ പരിപാടികൾ സുരക്ഷിതമാക്കുന്നതിനും നടപടികൾ സ്വീകരിച്ചിട്ടുണ്ട്.
ആമിറാത്ത് പാർക്കിൽ അൽ ആമിറാത്ത് ബാൻഡിന്റെ ഒമാനി നാടൻ കലകളുടെ അവതരണം, അൽ ആമിറാത്ത് ചാരിറ്റബിൾ ടീമിന്റെ ചിൽഡ്രൻസ് തിയേറ്റർ, മസ്‌കത്ത് ലീഗൽ ഏവിയേഷൻ ടീമിന്റെ ഫോറൻസിക് ഫ്‌ളൈറ്റ് ഷോ, മസ്‌കത്ത് ആന്റിക് കാർസ് ടീം ഒരുക്കുന്ന ക്ലാസിക് കാർ ഷോ, ജനറൽ ഡയറക്ടറേറ്റ് ഓഫ് സ്‌കൗട്ട്സ് ആൻഡ് ഗൈഡ്സ് അവതരിപ്പിക്കുന്ന മ്യൂസിക്കൽ സ്‌കൗട്ട് ബാൻഡ് പരിപാടികൾ തുടങ്ങിയവയും അരങ്ങേറും.
Post Your Comments