ശാസ്താംകോട്ട: ഓടിക്കൊണ്ടിരിക്കുന്ന സ്വകാര്യ ബസില്‍ നിന്നും തെറിച്ചു വീണ് വിദ്യാര്‍ത്ഥിക്ക് ഗുരുതര പരിക്ക്. പെരുവേലിക്കര മധുമന്ദിരത്തില്‍ മുരളീധരന്‍പിള്ളയുടെ മകന്‍ ആദർശിനാണ് (14) ഗുരുതര പരിക്കേറ്റത്.
ചൊവ്വാഴ്ച വൈകീട്ട് നാലിന് കടപുഴ പഴയ ബസ് സ്റ്റാൻഡിന് സമീപമാണ് സംഭവം. പുന്നമൂട് ആര്‍.എച്ച്.എസ് സ്‌കൂളിലെ ഒമ്പതാം ക്ലാസ് വിദ്യാര്‍ത്ഥിയായ ആദര്‍ശ് ക്ലാസ് കഴിഞ്ഞ് വീട്ടിലേക്ക് മടങ്ങവേയാണ് അപകടം നടന്നത്. ഇറങ്ങാനുള്ള സ്റ്റോപ് ആയപ്പോള്‍ സീറ്റില്‍ നിന്ന് എഴുന്നേറ്റ് ബസിന്റെ പിന്‍വാതിലിന്റ അടുത്തേക്ക് നീങ്ങവേ ബസ് വളവ് തിരിയുകയും ആദര്‍ശ് തെറിച്ചു വെളിയിലേക്ക് വീഴുകയുമായിരുന്നു. ബസില്‍ ഡോർ തുറന്ന് കിടക്കുകയായിരുന്നു.
ഉടന്‍ തന്നെ ശാസ്താംകോട്ടയിലെ സ്വകാര്യ ആശുപത്രിയിലും പരിക്ക് ഗുരുതരമായതിനാല്‍ തുടർന്ന്, ഉന്നത ചികിത്സയ്ക്കായി കൊല്ലത്തെ സ്വകാര്യ ആശുപത്രിയിലും പ്രവേശിപ്പിച്ചു.
പിന്നാലെ കെ.എസ്.ആര്‍.ടി.സി ബസ് ഉണ്ടായിരുന്നതിനാല്‍ സ്വകാര്യ ബസ് അമിത വേഗത്തിലായിരുന്നതായും അപകടസ്ഥലത്ത് ബസ് നിര്‍ത്താതെ ഏറെദൂരം പിന്നിട്ടശേഷമാണ് നിര്‍ത്തിയതെന്നും നാട്ടുകാര്‍ പറഞ്ഞു.
Post Your Comments