‘റിതുലിനും സിദ്ധാർത്ഥിനും ഇനി അമ്മയായി പ്രതിഭ’: സിസ്റ്റർ ലിനിയുടെ ഭർത്താവ് സജീഷ് രണ്ടാം വിവാഹത്തിനൊരുങ്ങുന്നു

കോഴിക്കോട്: നിപ പ്രതിരോധ പ്രവർത്തനത്തിനിടെ മരിച്ച സിസ്റ്റർ ലിനിയെ മലയാളികൾ ആരും ഒരിക്കലും മറക്കാനിടയില്ല. ലിനിയുടെ കുടുംബം പുതിയ ജീവിതത്തിലേക്ക്. ലിനിയുടെ ഭർത്താവിന്റെ ഒരു പോസ്റ്റ്‌ ആണ് ഇപ്പോൾ ശ്രദ്ധ നേടുന്നത്. താനും മക്കളും പുതിയൊരു ജീവിതത്തിലേക്ക് കാലെടുത്ത് വെയ്ക്കുകയാണ് എന്ന സന്തോഷ വാർത്തയാണ് സജീഷ് പങ്കുവെച്ചിരിക്കുന്നത്. റിതുലിനും സിദ്ധാർത്ഥിനും ഇനി അമ്മയും ചേച്ചിയുമായി പ്രതിഭയും, ദേവ പ്രിയയും ഉണ്ടാകുമെന്ന് സജീഷ് ഫേസ്ബുക്ക് പോസ്റ്റിലൂടെ പറഞ്ഞു.

ഓഗസ്റ്റ് 29ന് വടകര ലോകനാർകാവ് ക്ഷേത്രത്തിൽ വച്ചാണ് സതീഷിന്റെയും പ്രതിഭയുടെയും വിവാഹം നടത്തുക. മക്കൾക്കും പ്രതിഭയ്ക്കൊപ്പം ഉള്ള ചിത്രം പങ്കുവെച്ച കൊണ്ടായിരുന്നു സജീഷിന്റെ ഫേസ്ബുക്ക് പോസ്റ്റ്. ഇതുവരെ നൽകിയ സ്നേഹവും കരുലും കൂടെ വേണമെന്നും അനുഗ്രഹവും പ്രാർത്ഥനകളും ഉണ്ടാകണമെന്നും സന്തോഷ വാർത്ത പങ്കുവെച്ച് സജീഷ് കുറിച്ചു.

പേരാമ്പ്ര താലൂക്ക് ആശുപത്രിയിൽ നഴ്സ് ആയി സേവനം അനുഷ്ഠിക്കവെയായിരുന്നു നിപ വൈറസ് ബാധിച്ച് ലിനി മരിച്ചത്. നിപ ബാധിതരെ തുടക്കത്തില്‍ ശുശ്രൂഷിച്ചിരുന്ന ലിനി 2018 മെയ് 21നായിരുന്നു വിടപറഞ്ഞത്.

സജീഷിന്‍റെ വാക്കുകൾ:

‘പ്രിയ സുഹൃത്തുക്കളെ,

ഞാനും മക്കളും പുതിയ ഒരു ജീവിതത്തിലേക്ക്‌ കാലെടുത്ത്‌ വെയ്ക്കുകയാണ്‌. റിതുലിനും സിദ്ധാർത്ഥിനും ഇനി അമ്മയും ചേച്ചിയുമായി ഇവരും കൂടെ ഉണ്ടാകും. ഈ വരുന്ന ആഗസ്റ്റ്‌ 29 ന്‌ വടകര ലോകനാർ കാവ്‌ ക്ഷേത്രത്തിൽ വെച്ച്‌ ഞങ്ങൾ വിവാഹിതരാവുകയാണ്‌. ഇതുവരെ നിങ്ങൾ നൽകിയ എല്ലാ കരുതലും സ്നേഹവും കൂടെ തന്നെ വേണം. എല്ലാവരുടെയും അനുഗ്രഹവും പ്രാർത്ഥനകളും ആശംസകളും ഞങ്ങളോടൊപ്പം ഉണ്ടാകണം.
സ്നേഹത്തോടെ
സജീഷ്‌, റിതുൽ, സിദ്ധാർത്ഥ്‌, പ്രതിഭ, ദേവ പ്രിയ’.