വിലപിടിപ്പുള്ള സാധനങ്ങൾക്കായി നിർബന്ധം, നിരന്തരം മർദനം: ഭാര്യ തന്നെ അടിമയായി കാണുന്നുവെന്ന് പരാതിയുമായി യുവാവ്

ബെംഗളൂരു: വിവാഹം കഴിഞ്ഞ്​ കുറച്ചുനാളുകൾക്ക്​ ശേഷം ഭാര്യ തന്നെ അടിമയായി കാണുന്നുവെന്ന പരാതിയുമായി യുവാവ്​ പോലീസ്​ സ്റ്റേഷനിൽ.
ബെംഗളൂരുവിലെ സ്വകാര്യ കമ്പനിയിലെ ജീവനക്കാരനാണ്​ യുവാവ്​. ഭാര്യ തന്നെ​ പതിവായി മർദിക്കാറുണ്ടെന്നും എപ്പോഴും വിലപിടിപ്പുള്ള സാധനങ്ങൾ വാങ്ങാൻ നിർബന്ധിക്കുമെന്നും യുവാവിന്‍റെ പരാതിയിൽ പറയുന്നു. ഭാര്യയുടെ നിർബന്ധത്തിന് വഴങ്ങി സ്വകാര്യ ആവശ്യത്തിനായി ഒരു കാർ​ വാങ്ങിച്ചു നൽകിയെന്നും യുവാവ്​ വ്യക്തമാക്കി.

കഴിഞ്ഞവർഷം ജനുവരിയിലായിരുന്നു ഇരുവരുടെയും വിവാഹം. അപ്പാർട്ട്​മെന്‍റിലാണ്​ ഇരുവരും താമസിച്ചുവന്നത്. ഒരു ദിവസം രാത്രി പുറത്തുപോകണമെന്ന്​ ഭാര്യ ശാഠ്യം പിടിച്ചു. അപ്പാർട്ട്​മെന്‍റിന്റെ താക്കോൽ ചോദിച്ചെങ്കിലും പുറത്തുപോകരുതെന്ന് യുവാവ്​ ഭാര്യയോട്​ ആവശ്യപ്പെട്ടു. ശേഷം യുവാവ്​ ഉറങ്ങാൻ കിടന്നപ്പോൾ ഭാര്യ കട്ടിലിൽ കയറി തലയണകൊണ്ട്​ ശ്വാസം മുട്ടിക്കാൻ ശ്രമിച്ചുവെന്ന്​ പരാതിയിൽ പറയുന്നു.

യുവാവിന്റെ തലതല്ലിപൊളിച്ചു, നഗ്നതാ പ്രദർശനം: പൊലീസിന് മുന്നില്‍ മദ്യപാനിയുടെ അക്രമം

ശ്വാസമെടുക്കാൻ ബുദ്ധിമുട്ടിയതോടെ ഭാര്യയെ തള്ളിമാറ്റിയതായും ഇതോടെ നെഞ്ചിലും വയറിലും മാന്തുകയും കടിക്കുകയും ചെയ്തതായി യുവാവ് പരാതിയിൽ​ പറയുന്നു. വഴക്ക്​ രൂക്ഷമായതോടെ ഇരുവരും പോലീസിനെ വിളിക്കുകയും തുടർന്ന് രണ്ടുപേർക്കും കൗൺസലിങ്​ നൽകുകയും യുവാവിനെ ആശുപത്രിയിൽ പ്രവേശിപ്പിക്കുകയും ചെയ്തു.

ആവശ്യപ്പെട്ടതെല്ലാം നൽകിയിട്ടും ഭാര്യ തനിക്കെതിരെ പോലീസ്​ സ്റ്റേഷനിൽ സ്ത്രീധന പീഡനപരാതി നൽകിയെന്നും പിന്നീട് കോടതിയിൽ നിന്നും മുൻകൂർ ജാമ്യമെടുക്കുകയായിരുന്നുവെന്നും പരാതിയിൽ പറയുന്നു. അതേസമയം, ദമ്പതികളുടെ പരാതികളിൽ ​ അന്വേഷണം നടത്തുകയാണെന്നും പ്രശ്ന പരിഹാരത്തിനായി ഇരുവരെയും കൗൺസലിങ്ങിന്​ വിധേയമാക്കിയതായും മുതിർന്ന പോലീസ്​ ഉദ്യോഗസ്ഥൻ അറിയിച്ചു.