മാലിന്യ നിർമാർജനത്തിലെ പോരായ്മ : സംസ്ഥാനത്ത് എലിപ്പനി ബാധിതരുടെ എണ്ണം വർധിക്കുന്നു

തിരുവനന്തപുരം : സംസ്ഥാനത്ത് എലിപ്പനി ബാധിതരുടെ എണ്ണം വർധിക്കുന്നു. മാലിന്യ നിർമാർജനത്തിലെ പോരായ്മകളാണ് എലിപ്പനി വ്യാപനത്തിന് കരണമെന്നാണ് റിപ്പോർട്ട് . ഇന്നലെ മാത്രം 14 പേർക്കാണ് എലിപ്പനി സ്ഥിരീകരിച്ചത്. ഈ വർഷം ഇതുവരെ 1195 പേർക്കാണ് പരിശോധനയിലൂടെ എലിപ്പനി സ്ഥിരീകരിച്ചത്. 45 പേർ രോ​ഗം ബാധിച്ച് മരിച്ചു.

എലിപ്പനി രോ​ഗ ലക്ഷണങ്ങളോടെ ചികിൽസ തേടിയവ‌രുടെ എണ്ണവും സംസ്ഥാനത്ത് കൂടുകയാണ്. ഇന്നലെ വരെ സംസ്ഥാനത്തെ സർക്കാർ ആശുപത്രികളിൽ മാത്രം 1795 പേരാണ് രോ​ഗ ലക്ഷണങ്ങളോടെ ചികിൽസ തേടിയത്.  സംസ്ഥാനത്ത് തുടർച്ചയായി  മഴ കൂടി ആയതോടെ പലയിടത്തും മാലിന്യം ചീഞ്ഞളിഞ്ഞു. ഇത് രോ​ഗ പകർച്ചയുടെ ആക്കം കൂട്ടുകയാണ്.

Read Also  :  50 രൂപയുടെ സാധനം 75 രൂപ വിലയിട്ട് 70 രൂപയ്ക്ക് വില്‍ക്കുന്നു: തട്ടിപ്പ് ഡിസ്കൗണ്ടെന്ന് വിഡി.സതീശൻ

എലികൾ , കന്നുകാലികൾ, പട്ടി,പൂച്ച എന്നിവയുടെ മൂത്രം വഴി കെട്ടിക്കിടക്കുകയോ ഒലിച്ചിറങ്ങുകയോ ചെയ്യുന്ന വെള്ളത്തിലൂടെ മനുഷ്യരിലേക്ക് പകരുന്ന രോ​ഗമാണ് എലിപ്പനി. ശരീരത്തിലെ മിറിവുകളിലൂടേയോ അധിക സമയം വെള്ളത്തിൽ നിൽക്കുന്നത് വഴിയോ അണുക്കൾ ശരീരത്തിൽ പ്രവേശിക്കാം. ശക്തമായ പനി, തലവേദന, പേശികൾക്ക് വേദന, കണ്ണുകൾക്ക് ചുവപ്പുനിറം, ഛർ​ദി എന്നിവയാണ് ലക്ഷണങ്ങൾ. ഇത് തിരിച്ചറിഞ്ഞ് തുടക്കത്തിൽ തന്നെ ചികിൽസ എടുത്താൽ മരണം ഒഴിവാക്കാം. അല്ലാത്തപക്ഷം ശ്വാസകോശം,കരൾ,വൃക്കകൾ,ഹൃദയം എന്നിവയെ രോ​ഗം ബാധിക്കും. പത്തു മുതൽ 15 ശതമാനം വരെയാണ് മരണ സാധ്യത.