ഡല്‍ഹി : ഗാന്ധിനഗര്‍ മുന്‍സിപ്പല്‍ കോര്‍പ്പറേഷന്‍ തെരഞ്ഞെടുപ്പില്‍ ബിജെപിയ്‌ക്ക് വിജയം. 44 സീറ്റുകളില്‍ 41 എണ്ണത്തിലും വിജയിച്ചുകൊണ്ടാണ് ഗാന്ധിനഗര്‍ മുന്‍സിപ്പല്‍ കോര്‍പ്പറേഷന്‍ തെരഞ്ഞെടുപ്പില്‍ ബിജെപി ഭരണം പിടിച്ചെടുത്തത്. അതേസമയം കോൺഗ്രസിന് രണ്ട് സീറ്റ് മാത്രമേ ലഭിച്ചിട്ടൂള്ളു. ബിജെപിയെ അധികാരത്തിൽ നിന്നും താഴെയിറക്കുമെന്ന് വെല്ലുവിളിച്ചുകൊണ്ട് മത്സരിച്ച ആം ആദ്മി പാർട്ടി ഒരു സീറ്റ് മാത്രമാണ് നേടിയത്.
ഗുജറാത്ത് മുഖ്യമന്ത്രിയായി ഭൂപേന്ദ്ര പട്ടേൽ അധികാരത്തിലേറിയതിന് ശേഷം നടന്ന ആദ്യത്തെ തെരഞ്ഞെടുപ്പ് കൂടിയാണിത്. അതേസമയം വിജയത്തിനായി പ്രയ്തനിച്ച എല്ലാ പാര്‍ട്ടി പ്രവര്‍ത്തകരെയും പ്രധാനമന്ത്രി അഭിനന്ദിച്ചു . ജനങ്ങളും ബി.ജെ.പിയും തമ്മിലുള്ള ബന്ധത്തിന്റെ വേരുകള്‍ ആഴമുള്ളതാക്കി തീര്‍ക്കുന്നതാണ് ഈ വിജയമെന്ന് അദ്ദേഹം ട്വീറ്റ് ചെയ്തു.
സംസ്ഥാനത്തെ മുഖ്യമന്ത്രിയേയും മന്ത്രിമാരെയും മാറ്റിയതിന് ശേഷം നടക്കുന്ന ആദ്യ തെരഞ്ഞെടുപ്പിലാണ് ബിജെപി വൻ വിജയം നേടിയത്. പ്രധാനമന്ത്രി നരേന്ദ്രമോദിയിൽ ഗുജറാത്തിലെ ജനങ്ങൾക്ക് പൂർണ്ണ വിശ്വാസം ഉണ്ടെന്നതിന്റെ തെളിവാണ് തെരഞ്ഞെടുപ്പ് ഫലമെന്ന് സംസ്ഥാന ബിജെപി അധ്യക്ഷൻ സി ആർ പാട്ടീൽ പ്രതികരിച്ചു.
Post Your Comments