നായയ്ക്ക് ഭക്ഷണം കൊടുക്കുന്നതുകണ്ട് മരത്തടികൊണ്ട് അടിക്കാൻ വന്നു: പരാതിയുമായി മലേഷ്യയിൽ നിന്നുമുള്ള വനിത

കൊച്ചി: കളമശേരിയിൽ വിദേശ വനിതയെ ആക്രമിക്കുമെന്ന് ഭീഷണി. എച്ച്എംടി കോളനിക്കു സമീപം മൂന്നു വർഷമായി സ്ഥിരതാമസമാക്കിയ മലേഷ്യയിൽ നിന്നുള്ള പൂജ തെരാഷാ സ്റ്റാൻസ്‍ലസ് എന്ന വനിതയാണ് തന്നെ അയൽവാസി ആക്രമിക്കുമെന്ന് ഭീഷണിപ്പെടുത്തിയതായി പരാതി നൽകിയത്. സമീപവാസി മരത്തടികൊണ്ട് അടിക്കാൻ വന്നെന്നും അസഭ്യവർഷം നടത്തിയെന്നും വധഭീഷണിയുണ്ടെന്നും കാണിച്ചു ഡിജിപി ഉൾപ്പടെയുള്ളവർക്കു പരാതി നൽകി.

കടുത്ത മൃഗസ്നേഹിയായതിനാൽ സമീപത്തുള്ള നായകൾക്കു തീറ്റ കൊടുക്കുന്ന പതിവുണ്ട്. കഴിഞ്ഞ ദിവസം ക്ഷീണിച്ചുമെലിഞ്ഞ ഒരു നായയ്ക്ക് ഭക്ഷണം കൊടുക്കുന്നതുകണ്ട്, അതിഷ്ടപ്പെടാതിരുന്ന
സമീപവാസി അലി എന്നയാൾ ആക്രമിക്കുകയായിരുന്നു എന്നു പൂജ പറയുന്നു. നായയുമായി ഓടി രക്ഷപ്പെട്ടതിനാലാണ് അടി ഏൽക്കാതിരുന്നത്. തന്നെ ഉപദ്രവിക്കാൻ വന്ന വിവരം അദ്ദേഹത്തിന്റെ ഭാര്യയോടു പറഞ്ഞെങ്കിലും അവർ ക്ഷമാപണം നടത്തിയില്ലെന്നു മാത്രമല്ല, പൊലീസിനെ വിളിക്കാൻ വെല്ലുവിളിക്കുകയും ചെയ്തു.

15 മിനിറ്റിനകം പൊലീസ് എത്തിയെങ്കിലും ഔദ്യോഗികമായി പരാതി നൽകാൻ ആവശ്യപ്പെട്ടു മടങ്ങി. അരമണിക്കൂറിനു ശേഷം അലി തന്റെ ഗേറ്റ് തള്ളിത്തുറന്ന് അതിക്രമിച്ച് അകത്തു കയറാൻ ശ്രമം നടത്തി . ഇവിടെ അനാശാസ്യം നടത്തുകയാണെന്നു പറഞ്ഞ് അധിക്ഷേപിച്ചു. ഏതാനും വർഷം മുൻപു കേരളത്തിൽ എത്തിയപ്പോള്‍ പരിചയപ്പെട്ട ഇറ്റാലിയൻ പൗരനുമായി കളമശേരിയിലെ എച്ച്എംടി കോളനിക്കു സമീപം വീടു വാങ്ങിയാണ് ഇവർ താമസിക്കുന്നത്. നിലവിൽ പങ്കാളി നാട്ടിലേക്കു മടങ്ങിപ്പോയിട്ടുള്ളതിനാൽ ഒറ്റയ്ക്കാണു താമസിക്കുന്നത്. അതേസമയം കൊച്ചി സിറ്റി ഡപ്യൂട്ടി കമ്മിഷണർ, അനിമൽ വെൽഫെയർ ബോർഡ് തുടങ്ങിയവർക്കും പരാതി നൽകിയിട്ടുണ്ട്. ഇമെയിൽ അയച്ച പരാതി കളമശേരി സിഐയ്ക്കു പക്ഷേ, ലഭിച്ചിട്ടില്ല.