ന്യൂഡല്‍ഹി: ഐ.പി.എസ് പദവി ഉപേക്ഷിച്ച് രാഷ്ട്രീയക്കാരനായ കെ. അണ്ണാമലൈ ബി.ജെ.പി തമിഴ്നാട് ഘടകം അധ്യക്ഷനാകും. എല്‍. മുരുഗന്‍ കേന്ദ്ര സഹമന്ത്രിയായ ഒഴിവിലാണ് നിയമനം. തമിഴ്നാട് ബി.ജെ.പി അധ്യക്ഷ പദവിയിലെത്തുന്ന ഏറ്റവും പ്രായംകുറഞ്ഞ വ്യക്തിയാണ് 37കാരനായ അണ്ണാമലൈ. കാരൂര്‍ ജില്ലയിലെ കര്‍ഷക കുടുംബത്തില്‍ ജനിച്ച അണ്ണാമലൈ ഗൗണ്ടര്‍ സമുദായാംഗമാണ്. കാരൂര്‍ ഉള്‍പെടുന്ന കൊങ്ങു പ്രദേശത്ത് ബി.ജെ.പിക്ക് ശക്തമായ സാന്നിധ്യമുണ്ട്.
പാര്‍ട്ടിയില്‍ ചേര്‍ന്ന് ഒരു വര്‍ഷത്തിനുള്ളില്‍ ഒരാള്‍ സംസ്ഥാന അധ്യക്ഷ പദവിയില്‍ എത്തുന്നതും ഇതാദ്യമായാണ്.കര്‍ണാടക കേഡര്‍ 2011 ബാച്ച്‌ ഐ.പി.എസ് ഉദ്യോഗസ്ഥനായ അണ്ണാമലൈ ചികമഗളൂരു, ഉഡുപ്പി ജില്ലകളില്‍ പൊലീസ് സൂപ്രണ്ടായി സേവനമനുഷ്ടിച്ചിട്ടുണ്ട്. ബംഗളൂരു സൗത്ത് ഡെപ്യൂട്ടി പൊലീസ് കമീഷണറുമായിരുന്നു. 2019 സെപ്റ്റംബറിലാണ് പൊലീസ് കുപ്പായം ഉപേക്ഷിച്ചത്. കോയമ്പത്തൂരിലെ പ്രശസ്തമായ കോളജില്‍ നിന്നും എന്‍ജിനിയറിങ് പാസായ അണ്ണാമലൈ ഐ.ഐ.എം ലഖ്നോവില്‍ നിന്ന് എം.ബി.എ ബിരുദവും കരസ്ഥമാക്കിയിട്ടുണ്ട്.
കഴിഞ്ഞ വര്‍ഷം ആഗസ്റ്റില്‍ ബി.ജെ.പിയില്‍ ചേര്‍ന്ന അണ്ണാമലൈ നിലവില്‍ സംസ്ഥാന വൈസ് പ്രസിഡന്‍റാണ്.സഖ്യകക്ഷിയായ അണ്ണാ ഡി.എം.കെയുടെ പിന്തുണ കൂടിയുള്ള അണ്ണാമലൈ നിയമസഭ തെരഞ്ഞെടുപ്പില്‍ സ്വന്തം ജില്ലയിലെ തന്നെ അറവക്കുറിച്ചിയില്‍ ഡി.എം.കെയുടെ ആര്‍. ഇളങ്കോയോട് പരാജയപ്പെടുകയായിരുന്നു.
Post Your Comments