തിരുവനന്തപുരം: കേരളത്തിലെ ഓരോ തദ്ദേശസ്ഥാപനങ്ങളിലും ഹിന്ദു ബാങ്കുകൾ ആരംഭിക്കാൻ സംഘ്പരിവാർ പദ്ധതി ഇടുന്നതായി മാധ്യമം റിപ്പോർട്ട് ചെയ്തു. മിനിസ്ട്രി ഓഫ് കോഓപറേറ്റിവ് അഫയേഴ്സിനുകീഴിൽ രജിസ്റ്റർ ചെയ്ത നിധി ലിമിറ്റഡ് കമ്പനികളായാണ് ഹിന്ദു ബാങ്കുകൾ സംസ്ഥാനത്ത് രജിസ്റ്റർ ചെയ്തിരിക്കുന്നതെന്നാണ് മാധ്യമം റിപ്പോർട്ട് ചെയ്തിരിക്കുന്നത്.
‘ഹിന്ദുവിൻെറ പണം ഹിന്ദുക്കൾക്ക്’ എന്ന മുദ്രാവാക്യം ഉയർത്തിയാണ് സംഘ്പരിവാർ ബാങ്കുകൾ ആരംഭിക്കുന്നതെന്നാണ് പ്രചരിക്കുന്നത്. അംഗങ്ങളിൽ നിന്നുമാത്രം നിക്ഷേപം സ്വീകരിക്കുകയും അവർക്കുമാത്രം വായ്പ കൊടുക്കുകയും ചെയ്യുന്നുവെന്നതാണ് കമ്പനികളുടെ പ്രത്യേകതയെന്നും റിപ്പോർട്ടുകളുണ്ട്. ആദ്യഘട്ടത്തിലെ നൂറ് സ്ഥാപനങ്ങള്‍ തുടങ്ങിയിരിക്കുന്നത് ആശ്രമങ്ങളും മഠങ്ങളും ഉള്‍പ്പെടെ കേന്ദ്രീകരിച്ചാണെന്നുമാണ് പ്രചരിക്കുന്ന റിപ്പോർട്ട്.
എന്താണ് നിധി ലിമിറ്റഡ് കമ്പനികള്‍?
കേന്ദ്രസര്‍ക്കാരിൻ്റെ നിധി റൂള്‍സ് 2014 പ്രകാരം പ്രവര്‍ത്തിക്കുന്ന സഹകരണസംഘങ്ങളാണ് നിധി ലിമിറ്റഡ് കമ്പനികള്‍. നിക്ഷേപങ്ങൾക്ക് മികച്ച വരുമാനം നൽകുന്ന ധനകാര്യ സ്ഥാപനങ്ങളാണ് നിധി ലിമിറ്റഡ് കമ്പനികൾ. 2014ലെ നിധി നിയമങ്ങളും ആർബിഐ നിയമങ്ങളും ഇവയ്ക്ക് ബാധകമാണ്. പബ്ലിക് ലിമിറ്റഡ് ഫിനാൻസ് കമ്പനികളായ ഈ സ്ഥാപനങ്ങള്‍ വഴി സാധാരണ ബാങ്കുകളെപ്പോലെ സേവിങ്സ്, ഫിക്സഡ്, റിക്കറിങ് നിക്ഷേപങ്ങള്‍ നടത്തുകയും വായ്പകള്‍ എടുക്കുകയും ചെയ്യാം. അംഗങ്ങളുടെ നിക്ഷേപം സ്വീകരിക്കുകയും അവര്‍ക്ക് വായ്പ കൊടുക്കുകയും ചെയ്യുന്നതാണ് ഈ സ്ഥാപനങ്ങളുടെ പ്രത്യേകത.
നിധി ലിമിറ്റഡ് കമ്പനികൾ ആരംഭിക്കാൻ ചെയ്യേണ്ടത് എന്ത്?
മൂന്ന് ഡയറക്ടർമാർ, ഏഴ് അംഗങ്ങൾ, അഞ്ച് ലക്ഷം രൂപയുടെ ഓഹരി മൂലധനം എന്നിവ ഉണ്ടെങ്കിൽ നിയമവിധേയമായി നിധി ലിമിറ്റഡ് കമ്പനികൾ ആരംഭിക്കാം. കമ്പനി തുടങ്ങി ഒരു വർഷത്തിനകം 200 അംഗങ്ങളെ ചേർത്തിരിക്കണമെന്ന് വ്യവസ്ഥയുണ്ട്. ഓഹരികൾ വാങ്ങിയ ഷെയർ ഹോൾഡർമാരാകണം കമ്പനിയിലെ അംഗങ്ങൾ. സ്ഥാപനങ്ങളുടെ പേരിന്റെ അവസാന ഭാഗത്ത് നിധി ലിമിറ്റഡ് എന്ന് ചേർക്കണമെന്നും നിയമത്തിൽ വ്യവസ്ഥയുണ്ട്. 6 മാസം മുതൽ പരമാവധി 5 വർഷം വരെയാണ് സ്ഥിര നിക്ഷേപങ്ങളുടെ കാലാവധി. നിക്ഷേപിച്ച ആദ്യ മൂന്നു മാസത്തിനുള്ളിൽ നിക്ഷേപിച്ച തുക തിരിച്ചെടുക്കാനാവില്ല. മൂന്നു മുതൽ 6 മാസം വരെ കാലയളവിൽ തുക പിൻവലിച്ചാൽ പലിശ ലഭ്യമാകില്ല. ആറുമാസം കഴിഞ്ഞാണെങ്കിൽ പലിശയിൽ കുറവുണ്ടാകും.
Post Your Comments