വാട്സാപ്പ് വഴി പണം കൈമാറുന്നത് വളരെ എളുപ്പം; എങ്ങനെയെന്ന് കാണാം

ജനപ്രിയ മെസേജിങ് ആപ്പായ വാട്സാപ്പ് വഴി അനായാസം പണം കൈമാറാം. ഫേസ്ബുക്ക് ഉടമസ്ഥതയിലുള്ള വാട്ട്‌സ്‌ആപ്പിന്റെ പേയ്‌മെന്റ് ഫീച്ചറായ വാട്ട്‌സ്‌ആപ്പ് പേയ്‌മെന്റ് ഇപ്പോള്‍ ഇന്ത്യയില്‍ രണ്ടു കോടി ഉപയോക്താക്കള്‍ക്ക് ലഭ്യമായി. 2020 നവംബറിലാണ് വാട്സാപ്പ് പേയ്മെന്‍റ് പരീക്ഷണാടിസ്ഥാനത്തില്‍ പ്രവര്‍ത്തനം ആരംഭിച്ചത്. സ്റ്റേറ്റ് ബാങ്ക് ഓഫ് ഇന്ത്യ (എസ്ബിഐ), എച്ച്‌ഡിഎഫ്സി, ഐസിഐസിഐ, ആക്സിസ് ബാങ്ക് എന്നിവയുള്‍പ്പെടെയുള്ള ബാങ്കിംഗ് പങ്കാളികളുടെ പിന്തുണയോടെയാണ് ഈ സേവനം ആരംഭിച്ചത്.

Paytm, Google Pay, PhonePe എന്നിവയുള്‍പ്പെടെയുള്ള മറ്റ് ഡിജിറ്റല്‍ പേയ്‌മെന്റ് അപ്ലിക്കേഷനുകളുടെ എതിരാളിയായി വാട്ട്‌സ്‌ആപ്പ് പേയ്‌മെന്റ് മാറി കഴിഞ്ഞു. നാഷണല്‍ പേയ്‌മെന്റ്സ് കോര്‍പ്പറേഷന്‍ ഓഫ് ഇന്ത്യ (എന്‍‌പി‌സി‌ഐ) യൂണിഫൈഡ് പേയ്‌മെന്റ് ഇന്റര്‍ഫേസ് (യുപിഐ) സിസ്റ്റത്തിലാണ് വാട്ട്‌സ്‌ആപ്പ് പേയ്‌മെന്റ് പ്രവര്‍ത്തിക്കുന്നത്. – വാട്ട്‌സ്‌ആപ്പ് പേയ്‌മെന്റ് ഫീച്ചറിലൂടെ ഉപയോക്താക്കള്‍ക്ക് വാട്ട്‌സ്‌ആപ്പ് വഴി സന്ദേശം അയയ്ക്കുന്നതിന് സമാനമായ രീതിയില്‍ സുരക്ഷിതമായും എളുപ്പത്തിലും പണം കൈമാറാന്‍ കഴിയും.

വാട്ട്‌സ്‌ആപ്പ് പേയ്‌മെന്റ് വഴി എങ്ങനെ പണം കൈമാറാം

ഘട്ടം 1: നിങ്ങളുടെ സ്മാര്‍ട്ട്‌ഫോണില്‍ വാട്ട്‌സ്‌ആപ്പ് തുറക്കുക

ഘട്ടം 2: പണം അയയ്ക്കാന്‍ ആഗ്രഹിക്കുന്ന ആളുടെ കോണ്‍ടാക്റ്റില്‍ ക്ലിക്കുചെയ്യുക

ഘട്ടം 3: ചാറ്റിലെ അറ്റാച്ചുമെന്റ് ബട്ടണ്‍ അമര്‍ത്തുക

ഘട്ടം 4: അതില്‍ പേയ്മെന്‍റ് ഓപ്ഷന്‍ ക്ലിക്കുചെയ്യുക

ഘട്ടം 5: നല്‍കിയിരിക്കുന്ന പട്ടികയില്‍ നിന്ന് ബാങ്കിന്റെ പേര് തിരഞ്ഞെടുക്കുക

ഘട്ടം 6: എസ്‌എംഎസ് വേരിഫിക്കേഷന്‍ ടാപ്പുചെയ്യുക

ഘട്ടം 7: നിങ്ങളുടെ ഫോണില്‍ SMS വഴി ഒരു കോഡ് ലഭിക്കും.

ഘട്ടം 8: നിങ്ങളുടെ നമ്ബറുമായി ലിങ്കുചെയ്‌തിരിക്കുന്ന അക്കൗണ്ട് ദൃശ്യമാകും

ഘട്ടം 9: നിങ്ങള്‍ അയയ്ക്കാന്‍ ആഗ്രഹിക്കുന്ന തുക ടൈപ്പ് ചെയ്യുക

ഘട്ടം 10: നിങ്ങളുടെ പേയ്‌മെന്റ് സ്ഥിരീകരിക്കുന്നതിന് യുപിഐ പിന്‍ നല്‍കുക, നിങ്ങളുടെ പേയ്‌മെന്റ് പ്രോസസ്സ് ആകും.

ഇതിനുശേഷം, നിങ്ങളുടെ വാട്ട്‌സ്‌ആപ്പ് ചാറ്റിലേക്ക് റീഡയറക്‌ടുചെയ്യും, അവിടെ സന്ദേശ ബോക്‌സില്‍ അയച്ച തുക കാണാനാകും.

ഇന്ത്യയിലെ ഡിജിറ്റല്‍ പേയ്‌മെന്റ് മേഖല 2023 ഓടെ “അഞ്ചിരട്ടി” വര്‍ദ്ധിച്ച്‌ 74 ലക്ഷം കോടിയിലെത്തും. 30 കോടിയിലധികം ഉപയോക്താക്കളുള്ള ഇന്ത്യയിലെ ഏറ്റവും വലിയ മെസേജിങ് ആപ്പാണ് വാട്ട്‌സ്‌ആപ്പ്. ഇന്ത്യയിലുടനീളമുള്ള വാട്ട്‌സ്‌ആപ്പ് ഉപയോക്താക്കള്‍ക്ക് ലളിതവും സുരക്ഷിതവുമായ ഡിജിറ്റല്‍ പേയ്‌മെന്റുകള്‍ നടത്തുന്നതിന് എസ്‌ബി‌ഐ, ഐ‌സി‌ഐ‌സി‌ഐ ബാങ്ക്, എച്ച്‌ഡി‌എഫ്സി ബാങ്ക്, ആക്സിസ് ബാങ്ക് എന്നിവയുമായി പങ്കാളിയാകാന്‍ കമ്പനിക്ക് കഴിഞ്ഞിട്ടുണ്ടെന്ന് ഇന്ത്യ വാട്‌സ്‌ആപ്പ് മേധാവി അഭിജിത് ബോസ് പറഞ്ഞു.