മധ്യപ്രദേശ്: കമൽ നാഥ് ഐറ്റം എന്ന് വിശേഷിപ്പിച്ച ബിജെപി സ്ഥാനാർഥിക്കെതിരെ തെരഞ്ഞെടുപ്പ് കമ്മീഷന്റെ നോട്ടീസ് . കമൽ നാഥിനെ “ഭ്രാന്തന്‍” എന്ന് തിരിച്ചു വിളിച്ച സംഭവത്തിലാണ് മധ്യപ്രദേശിലെ ബി.ജെ.പി സ്ഥാനാര്‍ഥി ഇമാര്‍തി ദേവിക്ക് തെരഞ്ഞെടുപ്പ് കമ്മീഷന്‍ നോട്ടീസ് നല്‍കിയത് . പരാമര്‍ശവുമായി ബന്ധപ്പെട്ട് 48 മണിക്കൂറിനുള്ളില്‍ നിലപാട് വിശദീകരിക്കണമെന്ന് ആവശ്യപ്പെട്ടാണ് നോട്ടീസ്.
ഇമാര്‍തി ദേവിയെ മധ്യപ്രദേശ് കോണ്‍ഗ്രസ് നേതാവ് കമല്‍നാഥ് ‘ഐറ്റം’ എന്ന് വിശേഷിപ്പിച്ചത് വിവാദമായിരുന്നു. ഈ വിഷയത്തില്‍ നിലപാട് വിശദീകരിക്കണമെന്നാവശ്യപ്പെട്ട് കമല്‍നാഥിനും തെരഞ്ഞെടുപ്പ് കമീഷന്‍ നോട്ടീസ് നല്‍കിയിരുന്നു.
കമല്‍നാഥിന്റെ വിശദീകരണം ലഭിച്ചതിനെത്തുടര്‍ന്ന് പരസ്യമായി സംസാരിക്കുമ്പോള്‍ അത്തരം പരാമര്‍ശങ്ങള്‍ നടത്തരുതെന്ന് തെരഞ്ഞെടുപ്പ് കമീഷന്‍ അദ്ദേഹത്തിന് നിര്‍ദേശം നല്‍കിയിട്ടുണ്ട്. സെപ്റ്റംബര്‍ 29 മുതല്‍ മധ്യപ്രദേശില്‍ മാതൃകാ പെരുമാറ്റച്ചട്ടം പ്രാബല്യത്തില്‍ വന്നിട്ടുണ്ട്.
”മുഖ്യമന്ത്രിയാകാനായി ഇവിടെയെത്തിയ ബംഗാളിയാണദ്ദേഹം. അദ്ദേഹത്തിന് സംസാരിക്കാന്‍ അറിയില്ല. മുഖ്യമന്ത്രിയുടെ സീറ്റില്‍ നിന്ന് നീക്കം ചെയ്തതിന് ശേഷം അദ്ദേഹം ഭ്രാന്തനായിപ്പോയി. സമനില തെറ്റിനില്‍ക്കുന്ന അദ്ദേഹത്തെക്കുറിച്ച്‌ ഒന്നും പറയാനാവില്ല.” എന്നായിരുന്നു ഇമാര്‍തിയുടെ പരാമര്‍ശമെന്ന് തെരഞ്ഞെടുപ്പ് കമീഷന്‍ വ്യക്തമാക്കി.
Post Your Comments