പാക്കിസ്ഥാനിലെ പഞ്ചാബിലെ പഞ്ജ സാഹിബ് മേഖലയില്‍ നിന്ന് 17 കാരിയായ സിഖ് പെണ്‍കുട്ടിയെ തട്ടിക്കൊണ്ടുപോയതായി റിപ്പോര്‍ട്ടുകള്‍ പുറത്തുവന്ന് മണിക്കൂറുകള്‍ക്കകം പാകിസ്ഥാന്‍ ഹൈക്കമ്മീഷന്റെ മുതിര്‍ന്ന നയതന്ത്രജ്ഞനെ ഇന്ത്യ വിളിച്ചുവരുത്തി.
പാക്കിസ്ഥാനിലെ സിഖുകാര്‍ക്കെതിരായ അതിക്രമങ്ങള്‍ കൂടി വരുകയാണ്. ഇതിന്റെ ഏറ്റവുമൊടുവിലെ ഇരയായിരിക്കുകയാണ് ഗുരുദ്വാര പഞ്ജ സാഹിബ് പ്രീതം സിങ്ങിന്റെ ഗ്രാന്തിയുടെ മകളായ ബള്‍ബുള്‍ കൗര്‍ എന്ന പതിനേഴുകാരി. പെണ്‍കുട്ടിയെ 15 ദിവസം മുമ്പാണ് പാകിസ്ഥാനിലെ പഞ്ജാ സാഹിബില്‍ രണ്ട് മുസ്ലിം പുരുഷന്മാര്‍ തട്ടിക്കൊണ്ടുപോയത്. അതിനുശേഷം ബള്‍ബൂളിനെക്കുറിച്ച് ഒരു വിവരവും ഇല്ല. ജഗ്ജിത് കൗറിനെപ്പോലെ ഇസ്ലാം മതം സ്വീകരിച്ച് ഒരു മുസ്ലീം പുരുഷനുമായി വിവാഹം കഴിക്കാന്‍ കുട്ടി നിര്‍ബന്ധിതയാകുമെന്ന ആശങ്കയിലാണ് അവളുടെ കുടുംബം.
ബള്‍ബുളിന്റെ പിതാവിന് അയച്ച വീഡിയോയില്‍, മാതാപിതാക്കളുടെ അടുത്തേക്ക് പോയാല്‍ കൊല്ലപ്പെടുമെന്ന് പെണ്‍കുട്ടി ഭയപ്പെട്ടിട്ടുണ്ട്. ഇക്കാര്യത്തില്‍ പിതാവ് പ്രീതം സിങ്ങും പാകിസ്ഥാനിലെ അറ്റോക്കിന്റെ ഡെപ്യൂട്ടി കമ്മീഷണര്‍ക്ക് പരാതി നല്‍കിയിട്ടുണ്ട്. ഓഗസ്റ്റ് 31 ന് രാത്രി 10 മണിക്ക് തെരുവില്‍ മാലിന്യം തള്ളാന്‍ പോയതായും അതിനുശേഷം വീട്ടില്‍ തിരിച്ചെത്തിയിട്ടില്ലെന്നും ബള്‍ബൂളിന്റെ പിതാവ് പറയുന്നു. ബള്‍ബൂളിന്റെ പിതാവ് പറയുന്നതനുസരിച്ച്, സെപ്റ്റംബര്‍ 15 ന് അവള്‍ തന്നെ വിളിച്ച് ഒരു ‘മദ്രസ’യിലാണെന്ന് പറഞ്ഞു എന്ന് വ്യക്തമാക്കുന്നുണ്ട്.
അയല്‍രാജ്യത്ത് ഒരു സിഖ് പെണ്‍കുട്ടിയെ തട്ടിക്കൊണ്ടുപോയതായി പ്രതിഷേധിച്ച് ദില്ലി സിഖ് ഗുരുദ്വാര മാനേജ്‌മെന്റ് കമ്മിറ്റി (ഡിഎസ്ജിഎംസി) അംഗങ്ങള്‍ പാകിസ്ഥാന്‍ ഹൈക്കമ്മീഷന് സമീപം ഒത്തുകൂടി. ഗുരുദ്വാര പഞ്ജ സാഹിബിന്റെ തല ഗ്രാന്തിയുടെ മകളെ അടുത്തിടെ തട്ടിക്കൊണ്ടുപോയതായി ഡിഎസ്ജിഎംസി ചെയര്‍മാന്‍ മഞ്ജിന്ദര്‍ സിംഗ് സിര്‍സ ആരോപിച്ചു. പാകിസ്ഥാനില്‍ സിഖ് പെണ്‍കുട്ടികളെ തട്ടിക്കൊണ്ടുപോയെന്ന വിഷയം കേന്ദ്രസര്‍ക്കാര്‍ ഉന്നയിക്കണമെന്ന് ആവശ്യപ്പെട്ട് സെപ്റ്റംബര്‍ 20 ന് ഡി.എസ്.ജി.എം.സി പ്രതിനിധി സംഘം വിദേശകാര്യ മന്ത്രാലയത്തിലെ ഒരു ഉദ്യോഗസ്ഥനെ സന്ദര്‍ശിച്ചതായി സിര്‍സ പറഞ്ഞു
ചാണക്യപുരി പോലീസ് സ്റ്റേഷന് സമീപം 40 മുതല്‍ 50 വരെ ആളുകള്‍ പ്രതിഷേധ പ്രകടനം നടത്തിയതായി ദില്ലി പോലീസ് അറിയിച്ചു. അതേസമയം പ്രതിഷേധിച്ച ആരെയും കസ്റ്റഡിയിലെടുക്കുകയോ അറസ്റ്റ് ചെയ്യുകയോ ചെയ്തിട്ടില്ലെന്ന് ഒരു മുതിര്‍ന്ന പോലീസ് ഉദ്യോഗസ്ഥന്‍ പറഞ്ഞു.
Post Your Comments