ഖത്തറിൽ 136 പേര്‍ക്ക് കൂടി കോവിഡ്-19 : രോഗികളുടെ എണ്ണം 2500കടന്നു

ദോഹ : ഖത്തറിൽ 136 പേര്‍ക്ക് കൂടി കഴിഞ്ഞ ദിവസം( 10/04/2020) കോവിഡ്-19 സ്ഥിരീകരിച്ചു. ഇതോടെ രാജ്യത്തെ രോഗ ബാധിതരുടെ എണ്ണം 2512ആയി ഉയർന്നു. ഇതിൽ 2,279 പേരാണ് ചികിത്സയിൽ കഴിയുന്നത്. 21പേർ കൂടി സുഖം പ്രാപിച്ചതോടെ രോഗ മുക്തി നേടിയവരുടെ എണ്ണം 227 ആയി ഉയര്‍ന്നിട്ടുണ്ട്. കഴിഞ്ഞ 24 മണിക്കൂറിനിടെ 2,195 പേർ പരിശോധനക്ക് വിധേയമായതോടെ ആകെ എണ്ണം 45,339 ആയും ഉയര്‍ന്നിട്ടുണ്ട്. ഒരു സ്വദേശിയും 5 പ്രവാസികളും ഉള്‍പ്പെടെ 6 പേർ രാജ്യത്ത് ഇതുവരെ മരണപ്പെട്ടു. പൊതുജനങ്ങള്‍ മുന്‍കരുതല്‍ സ്വീകരിക്കണമെന്നും മറ്റുള്ളവരുമായി സുരക്ഷിത അകലം പാലിക്കണമെന്നും പൊതുജനാരോഗ്യ മന്ത്രാലയം കർശന നിർദേശം നൽകി.

ഒമാനില്‍ പുതിയതായി 62 പേര്‍ക്ക് കൂടി കോവിഡ് 19 സ്ഥിരീകരിച്ചു. ഇതോടെ രാജ്യത്ത് ഇതുവരെ കോവിഡ് വൈറസ് ബാധിതരുടെ എണ്ണം 546 ആയി ഉയർന്നെന്നു ഒമാൻ ആരോഗ്യ മന്ത്രാലയം ഇന്ന് വാർത്താകുറിപ്പിലൂടെ അറിയിച്ചു. രാജ്യത്ത് ഇത് വരെ മൂന്ന് മരണമാണ് റിപ്പോർട്ട് ചെയ്തത്. 109 പേര്‍ രോഗമുക്തി നേടി. ഒമാനില്‍ കൊവിഡ് ബാധ റിപ്പോര്‍ട്ട് ചെയ്യപ്പെടുന്നവരില്‍ പകുതിയും വിദേശികളാണെന്നാണ് കണക്കുകൾ ചൂണ്ടിക്കാട്ടുന്നത്.

Also read : മഹാരാഷ്ട്രയില്‍ കൊറോണമുക്തമാകുന്ന ആദ്യ ഹോട്ട്‌സ്‌പോട്ടായി ഇസ്ലാംപൂര്‍: 26 കേസുകളില്‍ 22 എണ്ണവും നെഗറ്റീവായി

അതേസമയം ഒമാനിൽ കോവിഡ് 19 ബാധിതരുടെ എണ്ണം ഓരോദിവസം വര്‍ധിക്കുന്നതും വൈറസ്സിന്റെ പ്രഭവ സ്ഥാനം ‘മത്രാ’ പ്രവിശ്യ ആയതും മലയാളികളടക്കമുള്ള പ്രവാസികളെ ആശങ്കയിലാക്കുന്നു. മലയാളികള്‍ തിങ്ങിപ്പാര്‍ക്കുന്ന ‘മത്രാ’ പ്രവിശ്യയില്‍ നിന്നും കൂടുതല്‍ കോവിഡ് കേസുകൾ റിപ്പോര്‍ട്ട് ചെയ്യപ്പെടുന്നത് മലയാളികളെ പ്രതിസന്ധിയിലാക്കുന്നുണ്ട്. എത്രയും പെട്ടന്ന് തങ്ങളെ നാട്ടിലേക്ക് എത്തിക്കണമെന്നാണ് ഇവർ ആവശ്യപ്പെടുന്നത്. ‘മത്രാ’ പ്രവിശ്യയില്‍ ഉള്‍പ്പെടുന്ന വാദികബീര്‍, ദാര്‍സൈത്, ഹാമാരിയ, റൂവി എന്നിവടങ്ങളില്‍ സ്ഥിരതാമസക്കാരായ വിദേശികളിൽ ഏറിയ പങ്കും ഇന്ത്യക്കാരാണ്. ഇതിൽ ഭൂരിഭാഗവും മലയാളികൾ.