മിലാന്‍ ഡെര്‍ബിയില്‍ ഇന്റര്‍ മിലാന് മിന്നുന്ന വിജയം ; യുവന്റസിന് വെല്ലുവിളി ഉയര്‍ത്തി പോയിന്റ് പട്ടികയില്‍ ഒന്നാമത്

ഇറ്റാലിയന്‍ ലീഗില്‍ നടന്ന മിലാന്‍ ഡെര്‍ബിയില്‍ ഇന്റര്‍ മിലാന് മിന്നുന്ന വിജയം രണ്ടിനെതിരെ നാല് ഗോളുകള്‍ക്കായിരുന്നു ഇന്ററിന്റെ ത്രസിപ്പിക്കുന്ന വിജയം. രണ്ട് ഗോളുകള്‍ക്ക് പിറകില്‍ നിന്ന ശേഷമായിരുന്നു ഇന്റര്‍ മിലാന്റെ തിരിച്ചുവരവ്. ഈ വിജയത്തോടെ ലീഗിന്റെ തലപ്പത്തേക്ക് തിരികെയെത്താനും ടീമിന് സാധിച്ചു. ജയത്തോടെ ഇന്റര്‍ മിലാന് യുവന്റസിനൊപ്പം 54 പോയിന്റായി.

ആദ്യ പകുതിയില്‍ ഇബ്രാഹിമോവിചിന്റെ മികവില്‍ രണ്ട് ഗോളിന് മുന്നില്‍ എത്താന്‍ മിലാന് ആയിരുന്നു. 40ആം മിനുട്ടില്‍ ഇബ്രയുടെ പാസില്‍ നിന്ന് റെബിചിലൂടെ മിലാന്‍ ആദ്യം ലീഡില്‍ എത്തി. പിന്നാലെ ഹാഫ് ടൈമിന് തൊട്ടുമുമ്പ് ഇബ്രാഹിമോവിചിന്റെ ഗോളിലൂടെ മിലാന്‍ 2 ഗോളുകള്‍ക്ക് മുന്നില്‍ എത്തി. എന്നാല്‍ രണ്ടാം പകുതിയില്‍ ഇന്റര്‍ മത്സരത്തിലേക്ക് തിരികെ വന്നു. 51ആം മിനുട്ടില്‍ ബ്രൊസോവിചിലൂടെ ഇന്ററിന്റെ ആദ്യ ഗോള്‍ വന്നു. 54ആം മിനുട്ടില്‍ വെസിനോയിലൂടെ ഇന്റര്‍ സമനിലയും നേടി. 70ആം മിനുട്ടില്‍ ഡെ വ്രിജിയിലൂടെ ആണ് ആദ്യമായി ഇന്റര്‍ ലീഡില്‍ എത്തിയത്. പിന്നാലെ ലുകാകുവിന്റെ ഗോളില്‍ 4-2ന്റെ വിജയവും ഇന്റര്‍ മിലാന്‍ ഉറപ്പിച്ചു.