ഷമ്മി ഹീറോയാടാ..ഹീറോ… മലയാളികള്‍ പാടി നടന്ന ആ ഡയലോഗ് ഒടുവില്‍ മുഹമ്മദ് ഷമിയും പറഞ്ഞു ; സഞ്ജുവിനൊപ്പം ഷമിയുടെ മാസ് ; വീഡിയോ കാണാം

മലയാളികള്‍ ഏറ്റെടുത്ത് പാടി നടന്ന ആ ഡയലോഗ് ഒടുവില്‍ മുഹമ്മദ് ഷമിയും പറഞ്ഞു. കുമ്പളങ്ങി നൈറ്റ്‌സിലെ ഫഹദ് പറഞ്ഞ് ഹിറ്റാക്കിയ മാസ് ഡയലോഗായ ‘ഷമ്മി ഹീറോയാടാ..ഹീറോ..’ എന്ന ഡയലോഗ് ഷമി പറഞ്ഞത് ,സോഷ്യല്‍ മീഡിയ ഒന്നടങ്കം ഏറ്റെടുത്തിരിക്കുകയാണ്. സഞ്ജുവിനൊപ്പമുള്ള ഒരു വിഡിയോയിലാണ് ഷമി രസകരമായി ഈ ഡയലോഗ് പറഞ്ഞിരിക്കുന്നത്. സഞ്ജു തന്നെയാണ് അദ്ദേഹത്തിന്റെ ഇന്‍സ്റ്റഗ്രാം പേജില്‍ വിഡിയോ പങ്കുവച്ചത്.

ടേബിള്‍ ടെന്നീസ് കളിച്ചുകൊണ്ടിരിക്കെ ശക്തിയായി ബോള്‍ അടിച്ച ശേഷമാണ് ഷമിയുടെ ഡയലോഗ്. ഒരു ഷോട്ട് അടിച്ച ശേഷം ക്യാമറയെ നോക്കിയാണ് ഷമിയുടെ ഡയലോഗ്. ഇതിന് പിന്നാലെ സഞ്ജുവിനെ ചേര്‍ത്ത് നിര്‍ത്തി ചിരിക്കുന്നതും വിഡിയോയില്‍ കാണാം. ഷമി ഗ്രൗണ്ടില്‍ താരമാകുന്ന മല്‍സരത്തിലെല്ലാം മലയാളിയുടെ നാവില്‍ ആദ്യമെത്തുന്ന ഡയലോഗും ഇതു തന്നെയാണ്.

https://www.facebook.com/ImSanjuSamson/videos/548351829224948/?t=8

ഇന്നലെ നടന്ന മത്സരത്തില്‍ ഇന്ത്യ ജയിക്കാന്‍ നിര്‍ണായക ഘടകമായത് ഷമിയുടെ മികവായിരുന്നു. സൂപ്പര്‍ ഓവറില്‍ ആയിരുന്നു ഇന്ത്യയുടെ വിജയം. അവസാന ഓവറില്‍ തകര്‍പ്പന്‍ പ്രകടനം പുറത്തെടുത്ത ഷമിയാണ് മത്സരം ഇന്ത്യക്ക് അനുകൂലമാക്കിയത്. അവസാന ഓവറില്‍ 9 റണ്‍സായിരുന്നു കിവീസിന് ജയിക്കാന്‍ വേണ്ടിയിരുന്നത്. ആദ്യ പന്തില്‍ സിക്‌സര്‍ വഴങ്ങിയെങ്കിലും പിന്നീട് രണ്ട് റണ്‍സ് മാത്രമായിരുന്നു ഷമി വിട്ടു നല്‍കിയത്. കൂടാതെ രണ്ട് വിക്കറ്റും ആ ഓവറില്‍ വീഴ്ത്തി. തുടര്‍ന്നാണ് മത്സരം സൂപ്പര്‍ ഓവറിലേക്ക് നീണ്ടത്. അവസാന രണ്ട് പന്തും സിക്സര്‍ പറത്തിയ രോഹിത് ശര്‍മ്മയാണ് സൂപ്പര്‍ ഓവറിലെ ഇന്ത്യയുടെ വിജയ ശില്‍പ്പി.